អង្គការសកម្មភាពសម្រាប់ការអប់រំនៅកម្ពុជា ហៅកាត់ ខេប និងអង្គការ HWPL Peace Education បានចុះអនុស្សារណៈយោគយល់គ្នាលើគម្រោងការអប់រំសន្តិភាព ដើម្បីសម្រេច​បាន​នូវ​សន្តិភាព​ប្រកបដោយនិរន្តភាពតាមរយៈការអប់រំ។ កម្មវិធីនេះ បានប្រព្រឹត្តទៅ​ក្រោម​វត្តមាន​របស់​ឯកឧត្តម វង ភីរុណ អនុរដ្ឋលេខាធិការក្រសួងអប់រំ យុវជននិងកីឡា។

នៅក្នុងពិធីចុះអនុស្សារណៈ កាលពីរសៀលថ្ងៃទី៣០ ខែមករា ឆ្នាំ២០២៤នេះ លោក សៅ វណ្ណា នាយក​ប្រតិបត្តិអង្គការ ខេប បានលើកឡើងថា ព្រឹត្តិការណ៍​នេះ​នឹង​បង្ហាញ​កិច្ច​ខិតខំ​ប្រឹងប្រែង​រួម​គ្នា​របស់​អង្គការទាំងពីរ ក្នុងការឈានឆ្ពោះទៅរកសុខសន្តិភាព។ លោកបានបន្តថា ដូចដឹង​ហើយ​ថា កម្ពុជា គឺជាប្រទេសដ៏ស្រស់ស្អាតមួយដែលបានឆ្លងកាត់ការផ្លាស់ប្តូររបត់នៃការដឹកនាំ និង​ឆ្លង​កាត់​នូវបញ្ហាប្រឈមជាប្រវត្តិសាស្ត្ររាប់ទសវត្សរ៍កន្លងមក មានទាំងល្អ និង​កំណត់​ត្រា​អាក្រក់​ជា​ប្រវត្តិសាស្ត្រ​ នៃមនុស្សជាតិពុំធ្លាប់ជួបប្រទះនៅលើសកលលោកនេះ គឺរបរបប្រល័យ​ពូជសាសន៍​ប៉ុល ពត។

លោកស្រី Jaymie Lee នាយកសាខា HWPL បានបញ្ជាក់ថា តាមរយៈ​កិច្ច​សហប្រតិបត្តិការ​ខាង​លើបន្ទាប់ពីនេះរំពឹងថា គោលដៅរួមនៃការទទួលបានសន្តិភាពតាមរយៈការអប់រំ នឹងសម្រេចបាន ហើយ​ការ​ខិតខំប្រឹងប្រែង ដើម្បីការអភិវឌ្ឍន៍ និងសន្តិភាពរបស់​ប្រទេស​នឹង​ប​ន្ត​ទៅ​មុខ​ទៀត​ប្រកប​ដោយចិរភាព នឹងមានឥទ្ធិពលយ៉ាងខ្លាំងដល់អនាគតប្រទេសកម្ពុជា និងរួមចំណែក​កសាង​សង្គម​សន្តិភាព។ លោកស្រីបានបន្ថែមថា បច្ចុប្បន្ន អង្គការ HWPL ដែលជាអង្គការ​សន្តិភាព​អន្តរជាតិ បានចុះហត្ថលេខាលើ MOU ជាមួយអង្គការ និងសាលារៀនចំនួន៥១៤ ជុំវិញ​ពិភព​លោក ដើម្បីអនុវត្តការអប់រំសន្តិភាព និងកំពុង​ជំរុញ​ការ​អប់រំ​ដែល​ចិញ្ចឹម​បី​បាច់​ប្រជាពលរដ្ឋ​ផ្សា​ភ្ជាប់​នឹង​សន្តិភាពជាមួយនឹងតម្លៃ ស្មារតីនៃសន្តិភាព។

ឯកឧត្តម​អនុរដ្ឋលេខាធិការក្រសួងអប់រំ យុវជន និងកីឡា បានមានប្រសាសន៍ថា ការអប់រំ​សន្តិភាព ដែលជាមធ្យោបាយមួយដើម្បីបន្សល់ទុកនូវមរតកនៃពិភពសន្តិភាពដ៏ស្រស់ស្អាត សម្រាប់​មនុស្សជំនាន់ក្រោយ។ តាមរយៈកិច្ចសហប្រតិបត្តិការ MOUនេះ រំពឹងថា គោលដៅ​រួម​នៃ​ការទទួលបានសន្តិភាពតាមរយៈការអប់រំនឹងសម្រេចបាន ហើយ​យើង​នឹង​ខិតខំ​ប្រឹង​ប្រែង​ដើម្បី​ការ​អភិវឌ្ឍន៍កម្មវិធីសុខសន្តិភាពរបស់ប្រទេសបន្តចាប់ពីពេលនេះតទៅមុខទៀត៕