សហរដ្ឋអាមេរិក និងចិន បានបង្កើតក្រុមការងាររួមគ្នាប្រឆាំងគ្រឿងញៀនកាលពីថ្ងៃអង្គារ (៣០ មករា) នៅក្នុងសញ្ញាដំបូងនៃកិច្ចសហប្រតិបត្តិការក្នុងការដោះស្រាយការរីករាលដាលនៃសារធាតុហ្វង់តានីល ចាប់តាំងពីចុងឆ្នាំ២០១៩ មុនពេលទំនាក់ទំនងទ្វេភាគីរវាងប្រទេសមហាអំណាចបានរង្គោះរង្គើ។

សកម្មភាពនេះបានធ្វើឡើងតាមកិច្ចប្រជុំកំពូលដ៏សំខាន់មួយនៅទីក្រុង សាន់ហ្រ្វាន់ស៊ីស្កូ (San Francisco) ក្នុងខែវិច្ឆិកា ដែលប្រធានាធិបតីសហរដ្ឋអាមេរិក លោក ចូ បៃដិន (Joe Biden) និងមេដឹកនាំចិន លោក ស៊ី ជីនពីង (Xi Jinping) បានយល់ព្រមធ្វើការរួមគ្នាទប់ស្កាត់ការផលិត និងការនាំចេញសារធាតុហ្វង់តានីល នៅក្នុងរបកគំហើញដ៏សំខាន់មួយ។

រដ្ឋមន្ត្រីក្រសួងសន្តិសុខសាធារណៈរបស់ប្រទេសចិន លោក វ៉ាង សៀវហុង (Wang Xiaohong) បាននិយាយថា លោកសង្ឃឹមថាភាគីទាំងពីរអាចសម្របសម្រួលរាល់កង្វល់របស់គ្នាទៅវិញទៅមក ព្រមទាំង «ពង្រឹង និងពង្រីកកិច្ចសហប្រតិបត្តិការ ដើម្បីផ្តល់ថាមពលវិជ្ជមានបន្ថែមទៀតសម្រាប់ទំនាក់ទំនងចិន-អាមេរិក ដែលមានស្ថិរភាព សុវត្ថិភាព និងនិរន្តភាព»។

នៅទីក្រុងវ៉ាស៊ីនតោន អ្នកនាំពាក្យសន្តិសុខជាតិរបស់សេតវិមាន លោក ចន ឃឺប៊ី (John Kirby) បាននិយាយថា ភាគីទាំងពីរបានប្តេជ្ញាសហការបង្កើនការសម្របសម្រួលនៃការអនុវត្តច្បាប់ ដើម្បីប្រយុទ្ធប្រឆាំងនឹងការចែកចាយ និងការនាំចេញសារធាតុគីមីសម្រាប់ថ្នាំអាភៀន ដើម្បីដោះស្រាយការផ្តល់ហិរញ្ញប្បទានខុសច្បាប់ និងបង្កើនការចែករំលែកព័ត៌មាន៕