កំពង់ឆ្នាំង៖ នៅព្រឹកថ្ងៃទី៣១ ខែមករា ឆ្នាំ២០២៤នេះ លោក ងិន ហ៊ុន ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្តកំពង់ឆ្នាំងបានថ្លែងថា ដីតំបន់៣ដែលរាជរដ្ឋាភិបាលកម្ពុជា បានដកហូតពីអ្នកចូលទន្ទ្រានកាន់កាប់ធ្វើស្រែប្រាំងមានប្រមាណជាង៦ម៉ឺនហិកតា ហើយបានចុះបញ្ជីលក្ខណៈប្រព័ន្ធជាដីរដ្ឋរួចហើយ។ ក៏ប៉ុន្តែថ្មីៗនេះ បន្ទាប់ពីមាន ស.ជ.ណ លេខ២៦ របស់ទីស្តីការគណៈរដ្ឋមន្ត្រី ចុះថ្ងៃទី០៩ ខែមករា ឆ្នាំ២០២៤ ដែលបានអនុញាតិអោយកសិករនៅស្រុកកំពង់លែង ខេត្តកំពង់ឆ្នាំងបានអាស្រ័យផលបណ្តោះអាសន្នមួយរដូវ ចាប់ពីខែធ្នូ ឆ្នាំ២០២៣ ដល់ខែកក្កដា ឆ្នាំ២០២៤នោះ គឺមានដីតំបន់៣ប្រមាណជាង៣ម៉ឺនហិកតា ត្រូវបានគេចូលអាស្រ័យផលវិញ។

លោក ងិន ហ៊ុន បានបន្តថា៖ ក្រោយពីរាជរដ្ឋាភិបាលបានដកហូតដីតំបន់៣ក្នុងស្រុកកំពង់លែង ស្រុកបរិបូណ៌ ស្រុកជលគីរីបានជាង៦ម៉ឺនហិកតារួចមក ក្រុមការងារថ្នាក់ខេត្តបានព្យាយាមថែរក្សាការពារជាប់ជាប្រចាំ រហូតបានចេញប័ណ្ណកម្មសិទ្ធិដីធ្លីលក្ខណៈប្រព័ន្ធជាដីរបស់រដ្ឋ ដោយមិនអោយអ្នកណាបំពានកាន់កាប់ ឬប៉ះពាល់ទៀតឡើយ។ ដីតំបន់៣ក្នុងខេត្តកំពង់ឆ្នាំងដែលបានចុះបញ្ជីជាលក្ខណៈប្រព័ន្ឌនោះ មានដីនៅក្នុងស្រុកកំពង់លែងប្រមាណជិត៦ម៉ឺនហិកតា នៅស្រុកបរិបូណ៌មានជាង៧ពាន់ហិកតា និងនៅស្រុកជលគីរីមានជាង៤ពាន់ហិកតា។ ក៏ប៉ុន្តែ ក្រោយមាន ស.ជ.ណ លេខ២៦ របស់ទីស្តីការគណៈរដ្ឋមន្ត្រី ចុះថ្ងៃទី០៩ ខែមករា ឆ្នាំ២០២៤ ដែលបានអនុញាតិអោយកសិករនៅស្រុកកំពង់លែង ខេត្តកំពង់ឆ្នាំងបានអាស្រ័យផលបណ្តោះអាសន្នមួយរដូវ ចាប់ពីខែធ្នូ ឆ្នាំ២០២៣ ដល់ខែកក្កដា ឆ្នាំ២០២៤ មកនោះ គឺមានដីប្រមាណជាង៣ម៉ឺនហិកតា ត្រូវបានគេចូលអាស្រ័យផលវិញ ហើយក្រុមការងារថ្នាក់ខេត្ត ក៏មិនអាចទប់ស្កាត់បានទាំងដីតំបន់៣ និងដីក្នុងតំបន់អភិរក្ស​ ​៕ ដោយ ÷ កាំង ហុងវាស្នា