ភ្នំពេញ៖ ឯកឧត្តម ខ្វៃ អាទិត្យា អនុរដ្ឋលេខាធិការ និងជាមន្រ្តីនាំពាក្យក្រសួងបរិស្ថាន បាន​ឱ្យ​ដឹង​ថា គិតត្រឹមថ្ងៃទី៣០ខែមករា ឆ្នាំ២០២៤ អ្នកចូលរួមអនុវត្តដោយផ្ទាល់ ក្នុងយុទ្ធនាការ​កាត់​បន្ថយ​ការ​ប្រើប្រាស់ប្លាស្ទិក ក្រោមប្រធានបទ «ថ្ងៃនេះ ខ្ញុំមិនប្រើថង់ប្លាស្ទិកទេ» នៅទូទាំង​ប្រទេស បានកើនឡើងជាង៤លាន ៦សែនអង្គ/នាក់ ខណៈយុទ្ធនាការ​នេះ​បាន​ចាប់​ផ្ដើម​តាំង​ពី​ថ្ងៃទី​១ ខែកញ្ញា ឆ្នាំ២០២៣។

ក្នុងនាមក្រសួងបរិស្ថាន ឯកឧត្តម ខ្វៃ អាទិត្យា បានថ្លែងអំណរគុណដល់ក្រសួង ស្ថាប័ន រដ្ឋបាល​រាជ​ធានីភ្នំពេញ និងរដ្ឋបាលខេត្តទាំងអស់ រួមទាំងអាជ្ញាធរថ្នាក់ក្រោមជាតិ អង្គការ ដៃគូ​អភិវឌ្ឍ​មួយ​ចំនួន​ទៀត ដែលបានសហការជាមួយក្រសួងបរិស្ថាន និងបានយកចិត្តទុកដាក់ចូលរួម និង​ជំរុញ​យុទ្ធនាការកាត់បន្ថយការប្រើប្រាស់ប្លាស្ទិក យ៉ាងផុសផុល និងទទួលបានជោគជ័យ គួរ​ជា​ទី​មោទនៈ​។

លើសពីនេះ ឯកឧត្តម ខ្វៃ អាទិត្យា បានស្នើឱ្យមានការខិតខំបន្ថែមទៀត ជំរុញបណ្តា​អាទិភាព នៃ​យុទ្ធសាស្រ្ត​ចក្រាវិស័យបរិស្ថាន រួមមាន៖ ស្អាត បៃតង និង ចីរភាព ដោយផ្ដោត​ជា​ពិសេស​លើ​យុទ្ធនាការ​ «ថ្ងៃនេះ ខ្ញុំមិនប្រើថង់ប្លាស្ទិកទេ» ដើម្បីបណ្តុះផ្នត់គំនិតនៃភាពស្អាតចេញពីចិត្ត ពី​គំនិត និងឥរិយាបទជួយដល់កម្ពុជា ដែលជាផ្ទះរបស់យើងទាំងអស់គ្នាស្អាត នាពេលខាងមុខ និង​ស្អាត​យូរ​អង្វែងតទៅ។

ក្រសួងបរិស្ថាន នឹងបន្តទៅជំហានបន្ទាប់សម្រាប់យុទ្ធនាការ «ថ្ងៃនេះ ខ្ញុំមិនប្រើប្លាស្ទិកទេ» ដែល​ទទួល​បាន​ប្រជាជនកម្ពុជា កន្លះប្រទេស ដែលបានចូលរួមអនុវត្ត មិនប្រើថង់ប្លាស្ទិក។ ជំហាន​ទី​២ នៃយុទ្ធនាការ គឺការចែកជូនធុងសំរាមទៅគ្រប់សាលារៀន និងវត្តអារាម ដែលអាចញែកសំរាម កន្លែង​ដាក់សំរាមសំណល់រឹង ប្លាស្ទិក សំរាមសម្រាប់កែច្ឆៃសម្រាប់ធ្វើជីជាដើម។ ជំហានបន្ទាប់នេះ គឺ​ការសំអាតបរិស្ថាន ដែលផ្តោតលើការសំអាតសំណល់ ប្លាស្ទិក នៅលើដី ក្នុងទឹក និង​សំអាត​ខ្យល់​លើ​អាកាស។ ដោយឡែកជំហានទី៣ គឺការដាក់ចេញ ក្នុងការ​ជំរុញ​ការ​លើក​កម្ពស់​កិច្ច​គាំពារ​បរិស្ថាន ភាពស្រស់ស្អាតរបស់កម្ពុជា គ្មានការបំពុល និងឈានទៅការលប់បំបាត់សំរាម សំណល់​ប្លាស្ទិក បន្តិចម្តងៗ ឱ្យអស់ពីកម្ពុជា ក្នុងពេលអនាគត៕ អត្ថបទ៖ទូច សោភ័ណ