អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា គ.ជ.ប បាន​កែ​សម្រួល​លើសកម្មភាពឃោសនាបោះឆ្នោតជ្រើសតាំងសមាជិកព្រឹទ្ធសភា ដែលប្រព្រឹត្ត​ទៅ​នាខែ​កុម្ភៈខាងមុខនេះ។

ថ្លែងប្រាប់ BTV News នៅថ្ងៃទី៣០ ខែមករា ឆ្នាំ២០២៤ ឯកឧត្តម ហង្ស ពុទ្ធា សមាជិក និង​ជា​អ្នក​នាំពាក្យ គ.ជ.ប បានឲ្យដឹងថា ក្នុងដំណើរការបោះឆ្នោតជ្រើសតាំងសមាជិកព្រឹទ្ធសភា នីតិកាល​ទី៥ គ.ជ.ប បានឈានដល់ដំណាក់កាលទី៣ គឺការរៀបចំ​យុទ្ធនាការ​ឃោសនា​បោះឆ្នោត សម្រាប់​បណ្តាគណបក្សនយោបាយដែលចុះបញ្ជីចូលរួមប្រកួតប្រជែង សម្រាប់​បង្ហាញ​នូវ​គោល​នយោបាយរបស់ខ្លួនទៅកាន់អ្នកបោះឆ្នោត។

ឯកឧត្តមបន្តថា ក្នុងយុទ្ធនាការឃោសនាបោះឆ្នោតជ្រើសតាំងសមាជិកព្រឹទ្ធសភានេះ គ.ជ.ប បាន​កំណត់ការហែក្បួនឃោសនាបោះឆ្នោតធំមានតែ ២ ដងប៉ុណ្ណោះ ខណៈយុទ្ធនាការ​ឃោសនា​បោះឆ្នោត​ខាង​មុខ បានកែសម្រួលហើយកំណត់ថាការឃោសនាដោយថ្មើរជើង និងមាន​មនុស្ស​ចាប់​ពី​ ២០​នាក់ឡើងក៏ត្រូវរាប់បញ្ជូលថាជាការហែក្បួនធំម្តងដូចគ្នា។

ស្របពេលយុទ្ធនាការឃោសនាបោះឆ្នោតនៅសល់តែ ១១ ថ្ងៃទៀតប៉ុណ្ណោះ អ្នកនាំពាក្យ គ.ជ.ប បាន​អំពាវនាវដល់បណ្តាគណបក្សនយោបាយដែលមានការយល់ដឹង និងបទពិសោធនទាំងអស់ មិន​ត្រូវយកយុទ្ធនាការឃោសនាបោះឆ្នោតជាវេទិកាវាយប្រហារគ្នាទៅវិញទៅមកនោះទេ។

សូមជម្រាបថា ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ នឹង​ប្រព្រឹត្ត​ទៅ​នា​ថ្ងៃ​ទី២៥ ខែកុម្ភៈ ឆ្នាំ២០២៤ ដោយមានអ្នកបោះឆ្នោតសរុបចំនួន ១១.៧៤៧ នាក់ក្នុង​នោះ​តំណាង​រាស្ត្រ​ក្នុងតំណែងមានចំនួន ១២៥ រូប និងក្រុមប្រឹក្សាឃុំ-សង្កាត់នៅទូទាំង​ប្រទេស​ចំនួន ១១.៦២២ នាក់ ដោយមានគណបក្សនយោបាយចំនួន ៤ ចូលរួមប្រកួតប្រជែង គឺ​គណបក្ស​ប្រជាជនកម្ពុជា គណបក្សហ្វ៊ុនស៊ិនប៉ិច គណបក្សកម្លាំងជាតិ និងគណបក្សឆន្ទះខ្មែរ៕ អត្ថបទ៖ សេក ឧត្តម