យោធាប្រទេសអ៊ីស្រាអែល បានប្រកាសកាលពីថ្ងៃអង្គារថា យោធាបានបូមទឹកសមុទ្រដើម្បីពន្លិច បណ្តាញផ្លូវរូងក្រោមដីរបស់ក្រុមហាម៉ាស នៅក្នុងតំបន់ហ្កាហ្សា។ វាជាលើកទីមួយហើយ ដែលកងកម្លាំងការពារអ៊ីស្រាអែល (IDF) បានទទួលស្គាល់ជាផ្លូវការ ដោយការប្រើយុទ្ធសាស្ត្រដ៏ចម្រូងចម្រាស ដែលអ្នកជំនាញផ្នែកជលសាស្ត្រនិងបរិស្ថាន របស់អង្គការសហប្រជាជាតិមួយចំនួន បានព្រមានថា អាចបំផ្លាញទឹកទទួលទានភាគច្រើននៅតំបន់ហ្កាហ្សា និងបង្កផលប៉ះពាល់ដល់កសិកម្ម។ កងកម្លាំងការពារអ៊ីស្រាអែល និយាយនៅក្នុងសេចក្តីថ្លែងការណ៍ថា ក្នុងអំឡុងពេលសង្រ្គាមកងកម្លាំង បានអនុវត្តសមត្ថភាពថ្មីៗដើម្បីបំផ្លាញហេដ្ឋារចនាសម្ព័ន្ធភេរវករក្រោមដីនៅក្នុងតំបន់ហ្កាហ្សា ដោយបញ្ជូនបរិមាណទឹកដ៏ច្រើន ចូលទៅក្នុងផ្លូវរូងក្រោមដី។ វិធានការនេះ គឺជាផ្នែកមួយនៃឧបករណ៍ ដែលត្រូវបានដាក់ពង្រាយដោយកងកម្លាំងការពារអ៊ីស្រាអែល( IDF) ដើម្បីបំផ្លាញបណ្តាញផ្លូវរូងក្រោមដី។ សមត្ថភាពនេះ ត្រូវបានបង្កើតឡើងក្នុងសមត្ថភាពវិជ្ជាជីវៈ រួមទាំងការវិភាគអំពីលក្ខណៈដី និងប្រព័ន្ធទឹកក្នុងតំបន់ ដើម្បីធានាបានថា ការខូចខាតមិនកើតមានឡើងចំពោះទឹកក្រោមដីនៅតំបន់នោះ។ ការបូមទឹក ត្រូវបានធ្វើឡើងតែនៅក្នុងផ្លូវរូងក្រោមដី និងទីតាំងសមស្រប ដែលត្រូវគ្នាទៅនឹងវិធីសាស្ត្រនៃប្រតិបត្តិការ ចំពោះករណីនីមួយៗ។ យោងតាមតួលេខរបស់អ៊ីស្រាអែលបានឲ្យដឹងថា ផ្លូវរូងក្រោមដីរបស់ក្រុមហាម៉ាស លាតសន្ធឹងលើចម្ងាយប្រហែល ៥៦០ទៅ៧២៥ គីឡូម៉ែត្រ នៅក្រោមតំបន់ឆ្នេរហ៊ុមព័ទ្ធប៉ាឡេស្ទីន។ កាលពីថ្ងៃអាទិត្យ សារព័ត៌មានអាមេរិក The Wall Street Journal បានដកស្រង់សម្តីមន្ត្រីអ៊ីស្រាអែល និងអាមេរិក ដែលបានរាយការណ៍ថា ៨០ ភាគរយនៃប្រព័ន្ធផ្លូវរូងក្រោមដីរបស់ក្រុមហាម៉ាស នៅតែនៅដដែលពុំមានការបំផ្លាញ។ យោងតាមការធ្វើបច្ចុប្បន្នភាពដែលបានចេញផ្សាយកាលពីថ្ងៃអង្គារ ដោយក្រសួងសុខាភិបាលប៉ាឡេស្ទីន មានមូលដ្ឋាននៅតំបន់ហ្កាហ្សា បានឲ្យដឹងថា យ៉ាងហោចណាស់ពលរដ្ឋប៉ាឡេស្ទីនចំនួន ២៦.៧៥១នាក់បានស្លាប់ និង ៦៥.៦៣៦នាក់ ផ្សេងទៀតបានរងរបួសនៅតំបន់ហ្កាហ្សា ចាប់តាំងពីអ៊ីស្រាអែលបានបើកការវាយលុកទ្រង់ទ្រាយធំរបស់ខ្លួន កាលពីថ្ងៃទី ៧ ខែតុលា ឆ្នាំ ២០២៣ ។