បណ្ដាអ្នកវិភាគ និងនាយកប្រតិបត្តិនានា បាននិយាយថា ការដាក់ទណ្ឌកម្មឡើងវិញរបស់សហរដ្ឋអាមេរិកលើវិស័យប្រេង និងឧស្ម័នរបស់វេណេហ្ស៊ុយអេឡា នឹងធ្វើឲ្យប៉ះពាល់ដល់សមត្ថភាពរបស់ប្រទេស OPEC (អង្គការនៃប្រទេសនាំប្រេងចេញ) ក្នុងការប្រមូលសាច់ប្រាក់ពីការនាំចេញប្រេងរបស់ខ្លួន កាត់បន្ថយការវិនិយោគថាមពលថ្មី និងបង្កើនហានិភ័យនៃកង្វះខាតប្រេងឥន្ធនៈក្នុងស្រុក។

ទីក្រុងវ៉ាស៊ីនតោន ក្នុងសប្តាហ៍នេះ បានបញ្ជាឲ្យផ្អាករាល់ប្រតិបត្តិការអាជីវកម្ម រវាងអង្គភាពរបស់សហរដ្ឋអាមេរិក និងក្រុមហ៊ុនរុករករ៉ែរបស់រដ្ឋវ៉េណេហ្ស៊ុយអេឡា Minerven ហើយបាននិយាយថា ខ្លួននឹងបន្ធូរបន្ថយទណ្ឌកម្មថាមពលរបស់ខ្លួន ក្នុងខែមេសា ប្រសិនបើរដ្ឋបាលប្រធានាធិបតីលោក Nicolas Maduro ប្រកាន់ខ្ជាប់នូវកិច្ចព្រមព្រៀងដែលបានចុះហត្ថលេខាកាលពីឆ្នាំមុន ដើម្បីទទួលយកលក្ខខណ្ឌសម្រាប់ ការបោះឆ្នោតប្រធានាធិបតីដោយយុត្តិធម៌។

សហរដ្ឋអាមេរិកកំពុងបង្កើនសម្ពាធរបស់ខ្លួន ចាប់តាំងពីតុលាការកំពូលរបស់ប្រទេស នៅអាមេរិកខាងត្បូងមួយនេះ កាលពីសប្តាហ៍មុនបានតម្កល់បម្រាម ដែលរារាំងបេក្ខជនប្រជែងតំណែងប្រធានាធិបតីរបស់គណបក្សប្រឆាំងឈានមុខគេ គឺលោកស្រី Maria Corina Machado មិនឲ្យចូលរួមការបោះឆ្នោត។

សហរដ្ឋអាមេរិក ដែលបានដាក់ទណ្ឌកម្មប្រេងលើកដំបូងលើវ៉េណេហ្ស៊ុយអេឡា ក្នុងឆ្នាំ២០១៩ បានផ្តល់ការបន្ធូរបន្ថយទណ្ឌកម្ម សម្រាប់ប្រទេសសមាជិកអង្គការ OPEC កាលពីខែតុលា ក្នុងការទទួលស្គាល់កិច្ចព្រមព្រៀងបោះឆ្នោត។

បើយោងតាមទីប្រឹក្សា Ecoanalitica ដែលមានមូលដ្ឋាននៅទីក្រុងការ៉ាកាស បានឲ្យដឹងថា ដោយសារការបន្ធូរបន្ថយទណ្ឌកម្ម វ៉េណេស៊ុយអេឡា ត្រូវបានគេរំពឹងថា នឹងបង្កើនប្រាក់ចំណូលប្រេងសរុបរបស់ខ្លួនដល់ទៅ ២០ពាន់លានដុល្លារ នៅឆ្នាំនេះ ពៅលគឺឡើងពីចំនួន ១២ពាន់លានដុល្លារ ក្នុងឆ្នាំ២០២៣។ ការនាំចេញប្រេងឆៅ និងគីមីឥន្ធនៈ កាន់តែច្រើនទៅកាន់អតិថិជនដែលបង់ប្រាក់ជាសាច់ប្រាក់ នៅក្នុងបណ្ដាប្រទេសនានា រាប់ពីសហរដ្ឋអាមេរិកទៅកាន់ប្រទេសឥណ្ឌា គឺនៅពីឆ្ងាយពីការព្យាករណ៍របស់ខ្លួន៕