នាយកប្រតិបត្តិក្រុមហ៊ុន Tesla លោក Elon Musk កាលពីថ្ងៃអង្គារ (ទី៣០ ខែមករា) បានចាប់ផ្តើមការស្ទង់មតិលើវេទិកាបណ្ដាញសង្គម X របស់លោក ដោយសួរថា តើក្រុមហ៊ុន Tesla របស់លោក គួរតែផ្លាស់ប្ដូររដ្ឋសាជីវកម្មទៅរដ្ឋ Texas (តិចសាស់) ពីរដ្ឋ Delaware (ដេឡាវ៉ែរ៍) ដែរ ឬទេ។

ការបង្ហោះនេះកើតឡើងបន្ទាប់ពីចៅក្រមនៅរដ្ឋ Delaware បានទុកជាមោឃភាពនូវកញ្ចប់ទូទាត់ប្រាក់ខ្ពស់បំផុតចំនួន ៥៦ពាន់លានដុល្លាររបស់ក្រុមហ៊ុន Tesla របស់លោក Musk នៅថ្ងៃដដែលនោះ ដោយហៅសំណងដែលផ្តល់ដោយក្រុមប្រឹក្សាភិបាលនៃក្រុមហ៊ុនផលិតរថយន្តអគ្គិសនី (EV) មួយនេះថា ជា «ចំនួនមិនអាចយល់បាន» ដែលមិនយុត្តិធម៌ចំពោះម្ចាស់ភាគហ៊ុន។

ភាគហ៊ុនរបស់ក្រុមហ៊ុន Tesla បានធ្លាក់ចុះប្រហែល ៣ភាគរយ នៅក្នុងម៉ោងជួញដូរ ហើយវិនិយោគិនមួយចំនួនបានទទួលយកសេចក្តីសម្រេចនេះ ដោយសង្ឃឹមថា វាអាចជំរុញឲ្យក្រុមហ៊ុន Tesla កែប្រែការគ្រប់គ្រងរបស់ខ្លួនឡើងវិញ។

សេចក្តីសម្រេច ដែលអាចមានការប្តឹងឧទ្ធរណ៍នោះ លុបចោលនូវកញ្ចប់ទឹកប្រាក់ទូទាត់សំណងដ៏ធំបំផុតនៅក្នុងសាជីវកម្មអាមេរិក។ ចៅក្រមបានរកឃើញថា សំណងផ្អែកលើភាគហ៊ុន ត្រូវបានចរចាដោយនាយក ដែលទំនងជាការទទួលខុសត្រូវធ្លាក់លើលោក Musk ដែលបច្ចុប្បន្នត្រូវបានចាត់ចំណាត់ថ្នាក់ដោយទស្សនាវដ្ដី Forbes ថា ជាអ្នកមានបំផុតរបស់ពិភពលោក៕