ភ្នំពេញ៖ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន ឯកឧត្តម Igor Driesmans ឯកអគ្គរដ្ឋទូតសហភាពអឺរ៉ុបប្រចាំកម្ពុជា ឯកឧត្តម Stefan Messerer ឯកអគ្គរដ្ឋទូតអាល្លឺម៉ង់ ប្រចាំកម្ពុជា នៅថ្ងៃទី៣១ខែ មករា ឆ្នាំ២០២៤ បានអញ្ជើញចូលរួមជាមួយថ្នាក់ដឹកនាំក្រសួងបរិស្ថាន ក្រសួងកសិកម្ម រុក្ខាប្រមាញ់ និងនេសាទ រដ្ឋបាលខេត្តសៀមរាប ខេត្តបាត់ដំបង និងអ្នកពាក់ព័ន្ធជាច្រើននាក់ទៀត ចូលរួមដាំដើមឈើចំនួនជាង២ពាន់ដើម នៅតំបន់ភ្លើងឆេះព្រៃលិចទឹក ក្នុងតំបន់ទន្លេសាប ស្ថិតនៅភូមិសាស្រ្តឃុំព្រែកទាល់ ស្រុកឯកភ្នំ ខេត្តបាត់ដំបង ។

នៅក្នុងឱកាសនោះ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន មានប្រសាសន៍ថា ការដាំដើមឈើ ក្នុងតំបន់បឹងទន្លេសាបនេះ នឹងជួយពង្រឹងការអភិរក្ស និងការពារព្រៃលិចទឹកដែលជាជម្រកដ៏សំខាន់ នៃពពួកជីវៈចម្រុះក្នុងបឹងទន្លេសាប។ ម្យ៉ាងទៀត ក៏ជាការថែរក្សា ការពារបឹងទន្លេសាបដែលជាជង្រុកត្រីដ៏ធំ និងបម្រើប្រជាពលរដ្ឋប្រមាណ៦លាននាក់នៅក្នុងប្រទេសកម្ពុជាផងដែរ។

ជាមួយគ្នានេះ ឯកឧត្តម អ៊ីហ្គូ ទ្រីសស្មេន( Igor Driesmans ) ឯកអគ្គរដ្ឋទូតសហភាពអឺរ៉ុប បានលើកឡើងដែរថា ទស្សនកិច្ច និងការដាំកូនឈើនៅក្នុងតំបន់រ៉ាមសារព្រែកទាល់ នាថ្ងៃនេះ គឺជាផ្នែកមួយនៃយុទ្ធនាការ For Our Planet របស់សហភាពអឺរ៉ុប។ សម្រាប់កម្ពុជា យុទ្ធនាការ For Our Planet ជាគំនិតគំនិតផ្តួចផ្តើមដោយសហភាពអឺរ៉ុប ក្នុងការគិតគូរ និងការពារបរិស្ថាននៅប្រទេសកម្ពុជា ដែលមានភាពទូលំទូលាយរាប់ចាប់តាំងពីគម្រោងអភិរក្ស និងកសិកម្មប្រកបដោយនិរន្តរភាព រហូតដល់កិច្ចខិតខំប្រឹងប្រែងការប្រើប្រាស់ថាមពលកកើតឡើងវិញ និងកម្មវិធីបង្កើនការយល់ដឹងស្តីពីការពារអភិរក្សធនធានធម្មជាតិដល់សហគមន៍៕

កន្លងទៅ ក្រសួងបរិស្ថានបានប្រកាសដាក់ចេញយុទ្ធនាការដាំដើមឈើ ១លានដើម ជារៀងរាល់ឆ្នាំ ដែលយុទ្ធនាការនេះ បានចាប់ផ្តើមកាលពីថ្ងៃទីថ្ងៃទី១០ខែតុលា ឆ្នាំ២០២៣ ក្នុងគោលបំណងដាំស្តារព្រៃ និងចូលរួមការពារអភិរក្សព្រៃឈើ និងបរិស្ថានធម្មជាតិ ដើម្បីបង្កើនគម្របព្រៃឱ្យបាន៦០% នៅឆ្នាំ២០៥០ និងអាចលក់កាបូនពីព្រៃឈើ ដើម្បីអាចបង្កើនប្រាក់ចំណូលនៅក្នុងសហគមន៍ ស្របតាមទស្សនវិស័យនៃយុទ្ធសាស្ដ្របញ្ចកោណដំណាក់កាលទី១ របស់រដ្ឋាភិបាលកម្ពុជា និងការអនុវត្តយុទ្ធសាស្រ្តចក្រាវិស័យបរិស្ថាន ២០២៣-២០២៨ ដែលផ្តោតលើមុំ ៣សំខាន់ រួមមាន៖ ស្អាត បៃតង និងចីរភាព។អត្ថបទ៖ទូច សោភ័ណ