ឆ្លើយតបចំពោះការរិះគន់មួយចំនួនពីមហាជន តាមបណ្តាញសង្គម ក្រោយធ្វើឃាត់ខ្លួនលោក កង សុផាណារ័ត្ន ឋានន្តរសក្តិអនុសេនីយ៍ត្រី ដោយសារតែបាញ់សត្វកុកកាលពីប៉ុន្មានថ្ងៃកន្លងទៅថ្មីៗនេះ ត្រូវបានអ្នកនាំពាក្យកងរាជអាវុធហត្ថលើផ្ទៃប្រទេសបានលើកឡើងថា ការធ្វើការឃាត់ខ្លួនបុគ្គលខាងលើនេះ គឺស្របទៅតាមច្បាប់ ខណៈលោកជាមន្ត្រីប្រតិបត្តិច្បាប់ត្រូវតែជាគំរូក្នុងការគោរពច្បាប់ កុំថាឡើយបាញ់សត្វកុកសូម្បីតែសត្វចាបក៏មិនត្រូវបាញ់ដែរព្រោះយើងជាមន្ត្រីប្រតិបត្តិច្បាប់។
តាមរយៈសេចក្តីប្រកាសព័ត៌មានរបស់អ្នកនាំពាក្យ នៃកងរាជអាវុធហត្ថលើផ្ទើប្រទេស ដែលទូរទស្សន៍ BTV ទទួលបាននាព្រឹកថ្ងៃទី១ ខែកុម្ភៈ ឆ្នាំ២០២៤នេះ បានលើកឡើងថា កងរាជអាវុធហត្ថបានឃើញការផ្សព្វផ្សាយឃ្លីបវីដេអូមួយ ដោយមានការបកស្រាយអំពីមន្ដ្រីកងរាជអាវុធហត្ថខេត្តក្រចេះ ប្រើកាំភ្លើងខ្យល់បាញ់សត្វស្លាប។ ចំពោះការបកស្រាយរបស់អាខោនហ្វេសបុកដែលមានឈ្មោះ ផែក វណ្ណៈ ត្រូវបានអ្នកនាំពាក្យកងរាជអាវុធហត្ថថាមិនខុសទេ ហើយកងរាជអាវុធហត្ថក៏បានប្រកាសថ្លែងអំណរ គុណចំពោះអាខោនហ្វេសបុកខាងលើនេះដែរ ដែលមានចិត្តឈឺឆ្អាល និងក្តីស្រលាញ់ដល់កម្លាំងកងរាជអាវុធហត្ថរបស់លោក រហូតដល់មានការសុំទៅមន្ត្រីរដ្ឋបាលព្រៃឈើ និងតំណាងអយ្យការឱ្យជួយទៀតផងដល់មន្រ្តីកងរាជអាវុធហត្ថដែលត្រូវបានឃាត់ខ្លួនផងដែរនោះ។
យ៉ាងណាក៏ដោយឆ្លើយតបចំពោះការរិះគន់ និងការលើកឡើងរបស់អាខោនហ្វេសបុកខាងលើ នេះ អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី បានបញ្ជាក់ថារដ្ឋបាលព្រៃឈើមានសមត្ថកិច្ចជាមន្ត្រីនគរបាលយុត្តិធម៌ ក្នុងការស៊ើបអង្កេតបទល្មើសព្រៃឈើ និងចងក្រងសំណុំរឿងបញ្ជូនទៅតុលាការ ដូចមានចែងក្នុងមាត្រា៧៦នៃច្បាប់ស្តីពីព្រៃឈើ។ ការឃាត់ខ្លួនឈ្មោះ កង សុផាណារ័ត្ន ប្រគល់ជូនមន្ត្រីរដ្ឋបាលព្រៃឈើគឺកងរាជអាវុធហត្ថអនុវត្តទៅតាមនីតិវិធីដែលមានចែងក្នុងច្បាប់ និងក្រមនីតិវិធីព្រហ្មទណ្ឌមិនមែនធ្វើតាមអារម្មណ៍ ឬធ្វើតាមការបញ្ចេញមតិក្នុងប្រព័ន្ធព័ត៌មានសង្គម ឬខ្លាចដោយមិនមានការទទួលខុសត្រូវនោះទេ។
អ្នកនាំពាក្យលោក អេង ហ៊ី បានសង្កត់ធ្ងន់ថា«ក្នុងនាមជាមន្ត្រីប្រតិបត្តិច្បាប់ ត្រូវតែជាគំរូក្នុងការគោរពច្បាប់ បើប្រព្រឹត្តអំពើល្មើស ត្រូវតែអនុវត្តតាមច្បាប់។ ហើយអ្នកដែលមានសិទ្ធិអំណាចចោទប្រកាន់មានតែតំណាងអយ្យការប៉ុណ្ណោះ មន្ត្រីនគរបាលយុត្តិធម៌មិនអាចតម្កល់រឿងក្តីព្រហ្មទណ្ឌឥតចាត់ការបានឡើយ»។
តាមរយៈសេចក្តីប្រកាសព័ត៌មាននេះ លោក អេង ហ៊ី បានបន្ថែមទៀតថា លោកនាយឧត្តមសេនីយ៍ មេបញ្ជាការកងរាជអាវុធហត្ថលើផ្ទៃប្រទេស បានដាក់ចេញនូវទិសស្លោកជាត្រីវិស័យក្នុងការអនុវត្តតួនាទីភារកិច្ច នាពេលកន្លងមកគឺ «ចំពោះប្រទេសជាតិត្រូវតែការពារ ចំពោះប្រជាត្រូវតែបម្រើច្បាប់ត្រូវតែគោរព និងបទល្មើសត្រូវតែបង្ក្រាប»។យោធិននៃកងរាជអាវុធហត្ថគ្រប់រូប ត្រូវបានអប់រំបណ្ដុះបណ្តាលហ្វឹកហ្វឺន ជាពិសេសការអប់រំចិត្តសាស្ត្រជាប្រចាំ ឱ្យគោរពច្បាប់ គោរពវិន័យកងទ័ព ប្រកាន់ខ្ជាប់ខ្ជួននូវក្រមសីលធម៌ វិជ្ជាជីវៈ «កុំថាឡើយបាញ់សត្វកុក សូម្បីតែសត្វចាបក៏មិនត្រូវបាញ់ទេ ព្រោះយើងជាមន្ត្រីប្រតិបត្តិច្បាប់»។
លោក អេង ហ៊ី បានលើកឡើងទៀតថា យោធិននៃកងរាជអាវុធហត្ថគ្រប់រូប ត្រូវបានយកចិត្តទុកដាក់ខ្ពស់ទាំងការហូប ការស្នាក់នៅ ការស្លៀកពាក់ពីក្បាលដល់ចុងជើង ការថែទាំ ព្យាបាលជំងឺ និងគោលនយោបាយដោះស្រាយទុក្ខលំបាក ដោយមានមូលនិធិមហាគ្រួសារកងរាជអាវុធហត្ថដែលជាគំនិតផ្តួចផ្តើមរបស់លោកនាយឧត្តមសេនីយ៍ មេបញ្ជាការកងរាជអាវុធហត្ថលើផ្ទៃប្រទេស ជាការចូលបុណ្យដោយស្ម័គ្រចិត្ត ទ្រទ្រង់ដល់គ្រួសាររបស់យោធិននៃកងរាជអាវុធហត្ថដែលពលី មរណៈក្នុងនោះថវិកាចូលបុណ្យរបស់លោកនាយឧត្តមសេនីយ៍ ក្នុងមួយសពចំនួន ៥.០០០.០០០រៀល ផងដែរ៕ អត្ថបទ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
