វិទ្យាស្ថានជាតិពហុបច្ចេកទេសកម្ពុជា បាននឹងកំពុងរៀបចំ​កម្មវិធីបោះជំរុំ លើកទី៧ ក្រោម​ប្រធានបទ «យុវជនក្រោមដំបូលសន្តិភាព» រយៈពេល៣ថ្ងៃ ចាប់ពីថ្ងៃទី១ ដល់ថ្ងៃទី៣ ខែកុម្ភៈ ឆ្នាំ​២០២៤។

បើតាមវិទ្យាស្ថានជាតិពហុបច្ចេកទេសកម្ពុជាកម្មវិធីបោះជំរុំ រយៈពេល៣ថ្ងៃនេះ គឺកំពុងរៀបចំ​ធ្វើ​ឡើង​នៅទី​តាំងបរិវេណវិទ្យាស្ថានផ្ទាល់ដែលមានការចូលរួមពីមន្រ្តីរាជការ សាស្រ្តាចារ្យ បុគ្គលិក និង​ប្អូនៗនិស្សិតព្រមទាំងសាស្រ្តាចារ្យ និងនិស្សិតដែលចូលរួមពីវិទ្យាស្ថានផ្សេងៗទូទាំង​គ្រឹះ​ស្ថាន​អប់រំ​បណ្តុះបណ្តាលបច្ចេកទេស និងវិជ្ជាជីវៈ នៅក្នុងព្រះរាជាណាចក្រកម្ពុជា ដែល​មាន​ចំនួន​៣៨៥១នាក់។

កម្មវិធីបោះជំរុំរយៈពេល៣ថ្ងៃក្រោមប្រធានបទ យុវជនក្រោមដំបូលសន្តិភាព គឺជាមួយផ្នែក​នៃ​ការ​ប្រមូល​ផ្តុំ​យុវជន​កម្ពុជាដែលជាអនាគតបញ្ញវន្តបច្ចេកវិទ្យា និងជាធនធានកម្រ​របស់​ជាតិ​ ដើម្បី​សិក្សា​ពី​របៀប​ នៃការបង្កើតជាក្រុម របៀបធ្វើការជាមួយក្រុម និងរបៀបរស់នៅជាមួយគ្នា។

ក្នុងរយៈពេល៣ថ្ងៃនេះនៅក្នុងជំរុំ សមាជិកនៅក្នុងជំរុំ នឹងមានឱកាសប្រាស្រ័យទាក់ទងគ្នា បង្កើត​ជា​បណ្តាញ​ទំនាក់ទំនងរវាងគ្នា និងគ្នាទៅថ្ងៃអនាគត មានឱកាសពត់លត់ដំ និងបន្សាំខ្លួន​ជាមួយ​គ្រប់​ស្ថានភាពរស់នៅប្រចាំថ្ងៃ តាមរយៈការគិតពិចារណាគ្រប់ជ្រុងជ្រោយដែល​មាន​តម្លៃ​ជា​រូបីយ​ផង និងអរូបីយផង ជាពិសេសមហាសាមគ្គីរបស់អនាគតបញ្ញវន្តដែល នឹង​ក្លាយ​ជា​ទំពាំង​ស្នង​ឫស្សី​ប្រកប​ដោយស្មារតីស្នេហាជាតិមាតុភូមិ និងក្លាយជាកំលាំងចលករយ៉ាងសកម្មក្នុងចលនា​កសាង និងការពារជាតិមាតុភូមិដែលមិនអាចឱ្យសត្រូវពីខាងក្រៅប្រមាថទានបាន​ឡើយ។

បើតាមវិទ្យាស្ថានការបោះជំរុំនេះត្រូវបានធ្វើឡើងចំនួន៧លើករួចមកហើយគិតចាប់ទាំងឆ្នាំ២០២៤នេះ ពោ​លគឺជំនាន់ទី១នៅឆ្នាំ២០០៦ ជំនាន់ទី២ នៅឆ្នាំ២០០៨ ជំនាន់ទី៣ នៅឆ្នាំ២០១១ ជំនាន់​ទី៤ នៅឆ្នាំ២០១៤ ជំនាន់៥ នៅឆ្នាំ ២០១៧ ជំនាន់ទី៦ នៅឆ្នាំ២០១៩ និងជំនាន់ទី៧ នៅ​ឆ្នាំ​២០២៤ នេះ ដែលកម្មវិធីកំពុងតែដំណើរការ៕