យោធារបស់កោះតៃវ៉ាន់កាលពីថ្ងៃពុធ ៣១ មករា បានធ្វើសេណារីយ៉ូ ឬចំហាកមួយ ជាទីដែលប្រទេសចិនភ្លាមៗនោះ បានប្រែក្លាយសមយុទ្ធធម្មតាមួយនៅជុំវិញកោះនេះ ទៅជាការវាយប្រហារជាក់ស្តែង នៅថ្ងៃតែមួយដែលចិនបានរៀបចំការល្បាតត្រៀមប្រយុទ្ធ មួយផ្សេងទៀតនៅជិតកោះតៃវ៉ាន់។

នាវាកងទ័ពជើងទឹក ទាហាន រថក្រោះ និងរថពាសដែក បានចូលរួមក្នុងសមយុទ្ធដែលបានធ្វើឡើងនៅ ទីក្រុង កៅស៊ីង (Kaohsiung)និងទីក្រុង តៃទុង (Taitung) ដោយមន្ត្រីយោធា លោក កូ ទីងយី ( Ko Ting-yi) ប្រាប់ប្រព័ន្ធផ្សព្វផ្សាយថា កងទ័ពបានពង្រឹងដំណើរការហ្វឹកហ្វឺន ដើម្បីទប់ទល់ ការប្រឈមទៅនឹងការគំរាមកំហែងដែលចេះតែកើនឡើងពីសត្រូវញឹកញាប់ ។

កោះតៃវ៉ាន់ ដែលចិនអះអាងថាជាទឹកដីរបស់ខ្លួន បើទោះបីជាមានការជំទាស់ពីរដ្ឋាភិបាលក្នុងទីក្រុងតៃប៉ិក៏ដោយ បាននិយាយថា កងកម្លាំងប្រដាប់អាវុធរបស់ប្រទេសចិន ប្រតិបត្តិការជាប្រចាំនៅលើអាកាស និងសមុទ្រជុំវិញកោះនេះ ក្នុងកិច្ចប្រឹងប្រែងមួយដើម្បីដាក់សម្ពាធលើកោះតៃវ៉ាន់ឱ្យទទួលយកអធិបតេយ្យភាពរបស់ចិន។

អាជ្ញាធរការពារជាតិរបស់កោះតៃវ៉ាន់និយាយថា យន្តហោះចម្បាំង និងនាវាចម្បាំងរបស់ចិន តែងតែអនុវត្ត ការល្បាតត្រៀមប្រយុទ្ធរួមគ្នា ។

កោះនេះបានរាយការណ៍ពីការល្បាតបែបនេះមួយទៀតកាលពីថ្ងៃពុធ ដែលមានការចូលរួមពីយន្តហោះចិនចំនួន ២២ គ្រឿង៕