ដោយទទួលបានការអនុញ្ញាតដ៏ខ្ពង់ខ្ពស់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃ​ព្រះរាជាណាចក្រកម្ពុជា, ឯកឧត្តម ឈៀង យ៉ាណារ៉ា ទេសរដ្ឋមន្ត្រី​ទទួលបន្ទុក​បេសកកម្ម​ពិសេស អនុប្រធានទី ២ ក្រុមប្រឹក្សាអភិវឌ្ឍន៍កម្ពុជា (ក.អ.ក) បានដឹកនាំ​គណៈ​ប្រតិភូ​កម្ពុជា​ចូល​រួម​នៅ​ក្នុងកិច្ចប្រជុំ First Regular Session 2024 of the Executive Board of UNDP នា​ថ្ងៃទី៣១ ខែមករា ឆ្នាំ២០២៤ នៅទីស្ដីការអង្គការសហប្រជាជាតិ ទីក្រុងញូវយ៉ក នៃ​សហរដ្ឋ​អាមេរិក។

គោលដៅចម្បង នៃកិច្ចប្រជុំគឺដើម្បី​ពិចារណាអនុម័ត​ឯកសារ​កម្ម​វិធី​ប្រចាំ​ប្រទេស​របស់​កម្មវិធី​អភិវឌ្ឍន៍​សហ​ប្រជាជាតិ ឆ្នាំ២០២៤-២០២៨ (UNDP Country Programme Document - CPD 2024-2028) សម្រាប់អនុវត្តនៅកម្ពុជា។ កិច្ចប្រជុំនេះមានការចូលរួមពីលោកជំទាវ ឯកឧត្តម ជាគណៈប្រតិភូជាន់ខ្ពស់ នៃប្រទេសសមាជិក, ប្រទេសសង្កេតការណ៍ និង​គណៈ​កម្មាធិការ​ប្រតិបត្តិ។

តាងនាមឱ្យរាជរដ្ឋាភិបាលកម្ពុជា ឯកឧត្តមទេសរដ្ឋមន្ត្រី បាន​ចូល​រួម​ថ្លែង​ការណ៍​គាំទ្រ​ជាផ្លូ​វ​ការ​លើ ឯកសារកម្មវិធីប្រចាំប្រទេសរបស់កម្មវិធីអភិវឌ្ឍន៍សហប្រជាជាតិ ឆ្នាំ២០២៤-២០២៨ ដោយ​បាន​បង្ហាញ​អំពីសារៈសំខាន់ នៃកិច្ចសហប្រតិបត្តិការអភិវឌ្ឍន៍រវាងរាជរដ្ឋាភិបាលកម្ពុជា និង​កម្ម​វិធី​អភិវឌ្ឍន៍​សហប្រជាជាតិ ។

ឯកឧត្តមទេសរដ្ឋមន្ត្រី បានមានប្រសាសន៍ថា ឯកសារ​កម្ម​វិធី​ប្រចាំ​ប្រទេស​ខាង​លើ​នេះ​ត្រូវ​បាន​រៀប​ចំ​ឡើង​ ដោយបាន​តម្រឹម​គោលដៅ​អាទិភាព​នៃ​ឯកសារ​កម្ម​វិធី​ជាមួយ​នឹង​គោល​នយោបាយ​អភិវឌ្ឍន៍​តាម​វិស័យ​របស់​កម្ពុជា និងវិស័យអាទិភាព នៃ​ក្រប​ខ័ណ្ឌ​សហប្រតិបត្តិការ​អភិវឌ្ឍន៍​ប្រកប​ដោយ​ចីរភាព ឆ្នាំ២០២៤-២០២៨ (UNSDCF 2024-2028)។

ឯកឧត្តមទេសរដ្ឋមន្ត្រី បានគូសបញ្ជាក់ថា គោលដៅអាទិភាព ទាំង​នេះនឹ​ង​ឆ្លើយ​តប​ទៅ​នឹង​វិស័យ​អាទិភាព​កម្ពុជា ដូចមានចែងក្នុងយុទ្ធសាស្ត្របញ្ចកោណ ដំណាក់កាលទី ១ ដើម្បីរួម​ចំណែក​ដល់​ការ​អនុវត្ត​គោលដៅអភិវឌ្ឍន៍កម្ពុជា ។ គោលដៅអាទិភាពរួមមាន ១) ការពន្លឿន ​កំណើន​ប្រកប​ដោយបរិយាប័ន្ន ពិពិធកម្មសេដ្ឋកិច្ច និងការអភិវឌ្ឍធនធានមនុស្ស ២) សកម្មភាព និង​ដំណោះ​ស្រាយពាក់ព័ន្ធនឹងអាកាសធាតុសម្រាប់កំណើន និងសុខុមាលភាព និង (៣) ការអភិវឌ្ឍសង្គម ដោយ​ផ្តោត​ការពង្រឹង ស្ថាប័ន លំហសង្គម និងការចូលរួម និងបរិវត្តកម្មឌីជីថល។

ជាកិច្ចបញ្ចប់ ឯកឧត្តមទេសរដ្ឋមន្ត្រីបានថ្លែង អំណរគុណចំពោះកម្មវិធីអភិវឌ្ឍន៍សហប្រជាជាតិ ដែល​បានផ្តល់កិច្ចសហការ​ដ៏ជិតស្និទ្ធ និងចូលរួមយ៉ាងសកម្ម ជាមួយរាជរដ្ឋាភិបាលកម្ពុជា ក្នុង​ការ​អភិវឌ្ឍ​សង្គម-សេដ្ឋកិច្ចកម្ពុជា។ ទន្ទឹមនឹងនេះ ឯកឧត្តមទេសរដ្ឋមន្ត្រី បានស្នើ​សុំ​គណៈកម្មាធិការ​ប្រតិបត្តិ​ឱ្យ​ពិចារណាអនុម័តឯកសារកម្មវិធីប្រចាំប្រទេសរបស់កម្មវិធីអភិវឌ្ឍន៍សហប្រជាជាតិ ឆ្នាំ​២០២៤-២០២៨ សម្រាប់កម្ពុជា៕