កាណាដា៖ មនុស្ស​រាប់​សិប​នាក់​បាន​ស្លាប់​នៅ​ប្រទេស​កាណាដា ខណៈ​ដែល​សីតុណ្ហភាព​នៅ​ទូទាំង​តំបន់​ប៉ាស៊ីហ្វិក​ភាគ​ពាយ័ព្យ​បន្ត​បំបែក​កំណត់ត្រា​។ នគរបាល​នៅ​រដ្ឋ British Columbia និយាយ​ថា ​ពួកគេ​បាន​ឆ្លើយតប​ទៅ​នឹង​ការ​ស្លាប់​ភ្លាមៗ ​ស្ទើរតែ ៧០​នាក់​ចាប់​តាំង​ពី​ថ្ងៃ​ចន្ទ ភាគច្រើន​ជា​មនុ​ស្ស​វ័យ​ចំណាស់​។​

​ពួកគេ​និយាយ​ថា រលក​កម្ដៅ​ដែល​កំពុង​ហក់​ឡើង​ខ្ពស់​នៅ​តំបន់ ​គឺជា​កត្តា​រួម​ចំណែក​មួយ​។​ កាល​ពី​ថ្ងៃ​អង្គារ​ប្រទេស​កាណាដា​បាន​កត់ត្រា ​សីតុណ្ហភាព​ខ្ពស់​បំផុត​ជាថ្មី​ម្តង​ទៀត​ដែល​មិន​ធ្លាប់​មាន ​សម្រាប់​ថ្ងៃ​ទី​៣ ​ជាប់ៗ​គ្នា​គឺ ៤៩.៥​អង្សា​សេ​នៅ​ទីក្រុង​លី​ត​ថុ​ន​ រដ្ឋ ​British Columbia​។​ មុន​សប្ដាហ៍​នេះ សីតុណ្ហភាព​នៅ​កាណាដា​មិនដែល​លើស​ពី ៤៥​អង្សា​សេ​ទេ​។​ ​ចំណែក​នៅ​សហរដ្ឋអាមេរិក​វិញ សីតុណ្ហភាព​នៅ​ក្នុង​ទីក្រុង Portland និង Seattle បាន​ឈាន​ដល់​កម្រិត​ខ្ពស់​បំផុត​ ចាប់​តាំង​ពី​កំណត់ត្រា​ខ្ពស់​បំផុត​នៅតែ​បន្ត ​ដែល​បាន​ចាប់ផ្ដើម​កាលពី​ទសវត្ស​ឆ្នាំ ១៩៤០។​ ទីក្រុង Portland នៅ​រដ្ឋ Oregon បាន​ឡើង​ដល់ ៤៦.១​អង្សា​សេ និង​ទីក្រុង Seattle ៤២.២​អង្សា​សេ​។ កម្ដៅ​ខ្លាំង​ល្មម​នឹង​ធ្វើ​ឲ្យ​ខ្សែកាប​រលាយ ដោយ​បិទ​សេវាកម្ម​រថយន្តក្រុង Portland Streetcar កាលពី​ថ្ងៃអាទិត្យ​៕

អត្ថបទ៖ សុខមាន