ការរំពឹងទុកអំពីមានសង្រ្គាមពេញទំហឹងរវាងអ៊ីស្រាអែល និងកងជីវពលហេសបូឡារបស់ប្រទេសលីបង់ ធ្វើឲ្យប្រជាជននៅសងខាងព្រំដែនមានការភ័យខ្លាច ប៉ុន្តែអ្នកខ្លះយល់ឃើញថា វាជាការធ្លាក់ចូលដែលជៀសមិនរួចពីសង្រ្គាម ដែលកំពុងបន្តរបស់អ៊ីស្រាអែលប្រឆាំងនឹងក្រុមហាម៉ាស នៅតំបន់ហ្កាហ្សា។

សង្រ្គាមបែបនេះ អាចជាការបំផ្លិចបំផ្លាញបំផុតដែលភាគីទាំងពីរ មិនធ្លាប់មានពីមុនមក។

អ៊ីស្រាអែល និងក្រុមហេសបូឡា សុទ្ធតែមានមេរៀនពីសង្គ្រាមចុងក្រោយរបស់ពួកគេ ក្នុងឆ្នាំ២០០៦ ដែលជាជម្លោះរយៈពេលមួយខែ ដែលបានបញ្ចប់ដោយស្មើគ្នា។ ពួកគេ ក៏មានពេល៤ខែដែរ ដើម្បីត្រៀមខ្លួនសម្រាប់សង្រ្គាមមួយទៀត ទោះបីជាសហរដ្ឋអាមេរិក ព្យាយាមទប់ស្កាត់ជម្លោះមិនឲ្យរីកធំឡើងក៏ដោយ។

ដូច្នេះហើយចូរមើលពីការត្រៀមខ្លួនរបស់ភាគីនីមួយៗ របៀបដែលសង្គ្រាម អាចនឹងកើតឡើង និងអ្វីដែលត្រូវបានធ្វើដើម្បីទប់ស្កាត់។

សង្គ្រាមឆ្នាំ ២០០៦ រយៈពេល៦ឆ្នាំ បន្ទាប់ពីកងកម្លាំងអ៊ីស្រាអែល បានដកខ្លួនចេញពីលីបង់ភាគខាងត្បូង បានផ្ទុះឡើង បន្ទាប់ពីក្រុមហេសបូឡា បានចាប់ទាហានអ៊ីស្រាអែលពីរនាក់ និងបានសម្លាប់មនុស្សជាច្រើននាក់ទៀត នៅក្នុងការវាយឆ្មក់ឆ្លងព្រំដែន។

អ៊ីស្រាអែល បានបើកការវាយលុកតាមផ្លូវអាកាស និងដោយថ្មើរជើងយ៉ាងពេញទំហឹង ហើយបានបិទផ្លូវដែលមានគោលបំណងដោះលែងចំណាប់ថ្នូរ និងបំផ្លាញសមត្ថភាពយោធារបស់ហេសបូឡា ជាបេសកកម្មមួយដែលទីបំផុត បានបរាជ័យ។