ក្រុមបាតុករ និងនគរបាលកុបកម្មបានប៉ះទង្គិចគ្នា ជុំវិញបរិវេណអាគាររដ្ឋសភារបស់ប្រទេសអាហ្សង់ទីន ក្នុងទីក្រុង Buenos Aires (ប៊ុយណូស៊ែ) កាលពីថ្ងៃពុធ (ទី៣១ ខែមករា) ខណៈដែលសមាជិកសភាបានពិភាក្សាលើសេចក្ដីស្នើច្បាប់កំណែទម្រង់សេដ្ឋកិច្ច ដែលត្រូវបានគេស្គាល់ថា ជា «សេចក្ដីស្នើច្បាប់ចម្រុះច្រើនយ៉ាង»។

ក្នុងហេតុការណ៍ប៉ះទង្គិចគ្នានោះ គេឃើញនគរបាលប្រើទឹកថ្នាំដែលផលិតពីម្រេច ដើម្បីបាញ់បំបែកការតវ៉ា និងចាប់ខ្លួនបាតុករជាច្រើននាក់។

គួរបញ្ជាក់ថា សភាជាន់ទាបអាហ្សង់ទីនកំពុងជជែកដេញដោលគ្នានៅថ្ងៃពុធនោះ ពាក់ព័ន្ធនឹងច្បាប់ដែលស្នើឡើងដោយប្រធានាធិបតីពួកសេរីនិយម លោក Javier Milei ដើម្បីកែលម្អឡើងវិញនូវសេដ្ឋកិច្ចរបស់ប្រទេសនៅអាមេរិកខាងត្បូងមួយនេះ ដែលកំពុងជាប់គាំងនៅក្រោមបន្ទុកបំណុលខ្ពស់ អតិផរណាដែលកំពុងបន្តមានលើសពី ២០០ភាគរយ និងការគ្រប់គ្រងទុនបម្រុងដ៏ច្រើនសន្ធឹកសន្ធាប់ ដើម្បីការពារប្រាក់ប៉េសូអាហ្សង់ទីន។

លោក Milei ប្រឈមនឹងឧបសគ្គដ៏សំខាន់មួយ ដើម្បីជំរុញសេចក្តីព្រាងច្បាប់នេះ ដោយក្រុមរដ្ឋាភិបាលចម្រុះរបស់លោកមានសំឡេងភាគតិចនៅក្នុងសភាទាំង២ ដែលមានន័យថា លោកត្រូវតែបញ្ចុះបញ្ចូលក្រុមសម្ព័ន្ធមិត្តឲ្យបាន៕