ក្រសួងរតនាគារសហរដ្ឋអាមេរិកកាលពីថ្ងៃពុធ បានប្រកាសដាក់ទណ្ឌកម្មប្រឆាំងនឹងអង្គភាពចំនួនបី និងបុគ្គលម្នាក់ នៅក្នុងប្រទេសលីបង់ និងទួរគីជុំវិញការគាំទ្រដល់ក្រុមហេសបូឡា និង កងកម្លាំងឆ្មាំបដិវត្តន៍អ៊ីស្លាមអ៊ីរ៉ង់ Quds Force។

ទណ្ឌកម្មទាំងនោះ បានចោទពួកគេថា បានបង្កើតប្រាក់ចំណូលរាប់រយលានដុល្លារពីការលក់ទំនិញអ៊ីរ៉ង់ ខណៈដែលគាំទ្របណ្តាញហិរញ្ញវត្ថុរបស់កងកម្លាំងឆ្មាំបដិវត្តន៍អ៊ីស្លាមអ៊ីរ៉ង់ IRGC-QF។

អង្គភាពទាំងបីដែលរងទណ្ឌកម្មគឺ ក្រុមហ៊ុន Mira Ihracat Ithalat Petrol ដែលមានមូលដ្ឋាននៅប្រទេសទួរគី ក្រុមហ៊ុនHydro Hydro Company for Drilling Equipment Rental ដែលមានមូលដ្ឋាននៅប្រទេសលីបង់ និងក្រុមហ៊ុន Yara Offshore SAL ដែលមានមូលដ្ឋាននៅប្រទេសលីបង់ផងដែរ។

ក្រសួងរតនាគារ បានចោទប្រកាន់ក្រុមហ៊ុន Mira ថា បានបទទិញ ដឹកជញ្ជូន និងលក់ទំនិញរបស់អ៊ីរ៉ង់។ ក្រុមហ៊ុន Yara Offshore SAL ត្រូវបានដាក់ទណ្ឌកម្មសម្រាប់ការលក់ទំនិញដ៏ច្រើនឲ្យទៅប្រទេសស៊ីរី និងធ្វើប្រតិបត្តិការក្នុងនាមក្រុមហ៊ុន Hezbollah និង ក្រុមហ៊ុនឈានមុខរបស់IRGC-QF គឺ ក្រុមហ៊ុនConcepto។

ក្រុមហ៊ុន Hydro ត្រូវបានគេចោទប្រកាន់ថា បានសម្របសម្រួលការដឹកជញ្ជូនទំនិញរបស់អ៊ីរ៉ង់ ដែលមានតម្លៃរាប់រយលានដុល្លារ ដែលប្រតិបត្តិការក្រោមការដឹកនាំរបស់មន្ត្រីជាន់ខ្ពស់ IRGC-QF។

ក្រសួងនរតនាគារ បានឲ្យដឹងថា បុគ្គលដែលត្រូវបានដាក់ទណ្ឌកម្មគឺ លោក អ៊ីប្រាហ៊ីម ទាឡាល់ អាល់ យូវ៉េ (Ibrahim Talal al-Uwayr) ដែលជានាយកប្រតិបត្តិ ឬជាបុគ្គលដែលគ្រប់គ្រងក្រុមហ៊ុន MIra ដែលប្រតិបត្តិការនៅក្រោមឈ្មោះក្លែងក្លាយ Ibrahim Agaoglu។