រដ្ឋមន្ត្រីការពារជាតិរបស់ប្រទេសអ៊ីតាលី បាននិយាយនៅថ្ងៃព្រហស្បតិ៍ថា ការរំខានដែលកំពុងបន្ត នៅក្នុងសមុទ្រក្រហម គំរាមកំហែងដល់អស្ថិរភាពសេដ្ឋកិច្ចរបស់ប្រទេសអ៊ីតាលី និងធ្វើឲ្យកំពង់ផែ នៅអឺរ៉ុបខាងត្បូង បាត់បង់។

ការវាយប្រហារចាប់តាំងពីពាក់កណ្តាលខែវិច្ឆិកាមកលើនាវាពាណិជ្ជកម្មដោយក្រុមឧទ្ទាមហ៊ួទីមានសម្ព័ន្ធភាពជាមួយអ៊ីរ៉ង់ ដែលគ្រប់គ្រងផ្នែកដែលមានប្រជាជនច្រើនជាងគេ ក្នុងប្រទេសយេម៉ែន បានរំខានដល់ការដឹកជញ្ជូនអន្តរជាតិ ដោយបង្ខំឲ្យក្រុមហ៊ុនមួយចំនួនផ្អាកការដឹកជញ្ជូនឆ្លងកាត់សមុទ្រក្រហម ហើយជំនួសមកវិញត្រូវចំណាយពេលយូរជាងការធ្វើដំណើរជុំវិញអាហ្រ្វិកភាគខាងត្បូង។

រដ្ឋមន្ត្រីការពារជាតិ លោក Guido Crosetto បានប្រាប់សមាជិកសភាមកពីគណៈកម្មាធិការការពារជាតិរបស់សភាថា៖«តាមទស្សនៈភូមិសាស្ត្រនយោបាយ ការបន្តនៃស្ថានភាពនេះ អាចនាំទៅរកការបាត់បង់ កំពង់ផែ នៅលើសមុទ្រមេឌីទែរ៉ាណេ។

កត្តារំខាននេះ មិនត្រឹមតែគំរាមកំហែងដល់សន្តិសុខនៃការធ្វើនាវាចរណ៍ប៉ុណ្ណោះទេ ថែមទាំងស្ថិរភាពសេដ្ឋកិច្ចរបស់ប្រទេសអ៊ីតាលី។

លោករដ្ឋមន្ត្រី បានថ្លែងថា ចរាចរណ៍ពាណិជ្ជកម្មតាមព្រែកជីកស៊ុយអេ ដែលលោកបានប៉ាន់ស្មានថា តំណាងឲ្យប្រហែល ៤០ ភាគរយនៃពាណិជ្ជកម្មតាមសមុទ្រសរុបរបស់ប្រទេសអ៊ីតាលី បានធ្លាក់ចុះ ៣៨ ភាគរយ នៅសប្តាហ៍ចុងក្រោយនៃឆ្នាំ២០២៣ ដោយបន្ថែមថា ពេលវេលាធ្វើនាវាចរណ៍ បានកើនឡើងពី ១០ ទៅ ១២ ថ្ងៃ ហើយការចំណាយបានកើនឡើងជិត ៥ដង។