សភារបស់កោះតៃវ៉ាន់ នៅថ្ងៃព្រហស្បតិ៍ (ទី១ ខែកុម្ភៈ) នេះ បានបោះឆ្នោតជ្រើសរើសអតីតបេក្ខជនប្រជែងតំណែងមេដឹកនាំ លោក Han Kuo-yu មកពីគណបក្សប្រឆាំងធំជាងគេបំផុត ជាប្រធានសភាថ្មី ដែលនឹងទទួលបន្ទុកទទួលស្វាគមន៍សមាជិកសភាបរទេសដែលទៅទស្សនកិច្ច និងដែលបក្សកាន់អំណាច បាននិយាយថា អ្នកគាំទ្រចិន។

គណបក្សប្រជាធិបតេយ្យជឿនលឿន (DPP) កាលពីខែមុន បានឈ្នះការបោះឆ្នោតជ្រើសរើសមេដឹកនាំរបស់កោះតៃវ៉ាន់ ប៉ុន្តែមិនទទួលបានសំឡេងភាគច្រើន នៅក្នុងសភាទេ។ ប្រទេសចិនដែលអះអាងថា កោះតៃវ៉ាន់ជាកម្មសិទ្ធិរបស់ខ្លួន បើទោះបីជាមានការជំទាស់ពីរដ្ឋបាលនៅទីក្រុងតៃប៉ិក៏ដោយ ចាត់ទុកគណបក្ស DPP ជាក្រុមបំបែកខ្លួន។

លោក Han របស់គណបក្ស Kuomintang (KMT) ដែលបានរងបរាជ័យយ៉ាងធ្ងន់ធ្ងរក្នុងការបោះឆ្នោត ដោយសារលោកស្រី Tsai Ing-wen របស់គណបក្ស DPP កាលពីឆ្នាំ២០២០ បានឈ្នះការបោះឆ្នោតសម្រាប់តំណែងប្រធានសភានេះ។ គណបក្សប្រជាជនតៃវ៉ាន់ (TPP) បានបដិសេធមិនបោះឆ្នោត បន្ទាប់ពីបេក្ខជនរបស់គណបក្សនេះ ចាញ់ក្នុងការបោះឆ្នោតជុំទី១។

បាតុករមួយក្រុម នៅព្រឹកថ្ងៃព្រហស្បតិ៍នេះ បានប្រមូលផ្តុំគ្នានៅជិតសភាកោះតៃវ៉ាន់ មុនពេលការបោះឆ្នោតប្រព្រឹត្តទៅ ដោយស្រែកពាក្យស្លោក និងកាន់បដា ខណៈដែលពួកគេជំទាស់នឹងបេក្ខភាពរបស់លោក Han។ ម្នាក់ក្នុងចំណោមពួកគេ បាននិយាយថា ពួកគេព្រួយបារម្ភ ចំពោះលោក Han ប្រសិនបើជាប់ឆ្នោត «អាចនឹងបដិសេធប្រទេសប្រជាធិបតេយ្យ»។

លោក Han ដែលមិនបានឆ្លើយសំណួររបស់ប្រព័ន្ធផ្សព្វផ្សាយ បានបដិសេធយ៉ាងដាច់អហង្ការថា មិនបានគាំទ្រទីក្រុងប៉េកាំង ដូចគណបក្ស KMT នោះទេ៕