ទូរទស្សន៍ al-Masirah TV គ្រប់គ្រងដោយក្រុមហ៊ួទី បានរាយការណ៍ថា ក្រុមចម្រុះដែនសមុទ្រអាមេរិក-អង់គ្លេស បានបើកការវាយប្រហារលើទីក្រុងកំពង់ផែសមុទ្រក្រហមហូដេដា ( Hodeidah) របស់ប្រទេសយេម៉ែន នៅព្រឹកថ្ងៃព្រហស្បតិ៍នេះ។

របាយការណ៍នោះ បានឲ្យដឹងថា ការវាយប្រហារ បានកំណត់គោលដៅទៅលើតំបន់អាល់់ចាបាណា( Al-Jabanah) ភាគខាងជើងនៃទីក្រុងឆ្នេរសមុទ្រហូដេដា នៅភាគខាងលិចនៃប្រទេសនេះ ដោយពុំបានផ្តល់ព័ត៌មានលម្អិតបន្ថែមនោះទេ។

ទីបញ្ជាការកណ្តាលរបស់សហរដ្ឋអាមេរិក បាននិយាយនៅក្នុងសេចក្តីថ្លែងការណ៍មួយថា ការវាយប្រហារនេះ បានកើតឡើងប៉ុន្មានម៉ោង បន្ទាប់ពីក្រុមចម្រុះ បានវាយប្រហារដោយមីស៊ីលពីដីទៅលើអាកាសរបស់ ក្រុមហ៊ួទីនៅទីក្រុងសាដា ( Saada) នៅភាគខាងជើងនៃប្រទេសនេះ កាលពីល្ងាចថ្ងៃពុធ ។

ក្រុមហ៊ួទី បានប្រកាសថា ពួកគេបានបើកការវាយប្រហារដោយមីស៊ីលទៅលើនាវាពាណិជ្ជកម្មអាមេរិក «Kol» នៅឈូងសមុទ្រ Aden កាលពីយប់ថ្ងៃពុធ ហើយបានវាយប្រហារវាដោយផ្ទាល់តែម្តង។

អ្នកនាំពាក្យយោធាហ៊ួទី លោក យ៉ាយ៉ា សារៀ (Yahya Sarea) បានប្រកាសថា នាវាពាណិជ្ជកម្ម និងនាវាចម្បាំងរបស់សហរដ្ឋអាមេរិក និងអង់គ្លេសទាំងអស់ ជា «គោលដៅស្របច្បាប់» សម្រាប់កងកម្លាំង ហ៊ួទី រហូតដល់ក្រុមចម្រុះឈប់វាយប្រហារទីតាំងហ៊ួទី ដោយប្តេជ្ញាថា នឹង «ប្រឈមមុខនឹងភាពតានតឹងកើនឡើងកាន់តែខ្លាំងឡើង» នៅក្នុងសេចក្តីថ្លែងការណ៍ទូរទស្សន៍មួយកាលពីយប់ថ្ងៃពុធ។