គណបក្សកាន់អំណាចរបស់ប្រទេសហ្សកហ្ស៊ី នៅថ្ងៃព្រហស្បតិ៍ (ទី១ខែកុម្ភៈ) បានតែងតាំងមេដឹកនាំនិយាយចំៗរបស់ខ្លួន គឺលោក Irakli Kobakhidze ជានាយករដ្ឋមន្ត្រី ខណៈប្រទេសនៅតំបន់ភ្នំ Caucasus ភាគខាងត្បូងមួយនេះ ដែលត្រូវបានតាមចែចូវទាំងពីរុស្ស៊ី និងលោកខាងលិច ត្រៀមរៀបចំការបោះឆ្នោតសភា។

លោក Kobakhidze ដែលបានដឹកនាំគណបក្សសម្ព័ន្ធ Georgian Dream ចាប់តាំងពីឆ្នាំ២០២១ ត្រូវបានគេស្គាល់ដោយសារវោហាសាស្ត្រដ៏មុតស្រួចរបស់លោក និងភាពថ្លឹងថ្លែង ដែលជួនកាលការរិះគន់យ៉ាងចាស់ដៃចំពោះលោកខាងលិច និងអ៊ុយក្រែន អមជាមួយនឹងសេចក្តីថ្លែងការណ៍អំពីគោលបំណងរបស់ប្រទេសរបស់លោក ដែលចង់ចូលរួមជាមួយសហភាពអឺរ៉ុប និងសម្ព័ន្ធមិត្តយោធាណាតូ។

លោកក៏ត្រូវបានគេស្គាល់ផងដែរ សម្រាប់ការរិះគន់ដោយនិយាយចំៗទៅលើគណបក្សប្រឆាំង និងអតីតប្រធានាធិបតីលោក Mikheil Saakashvili ដែលជាប់ពន្ធនាគារ។ នៅក្នុងសុន្ទរកថានៅឯសមាជគណបក្សរបស់លោក បន្ទាប់ពីត្រូវបានតែងតាំងនេះ លោក Kobakhidze ដែលមកជំនួសតំណែងរបស់លោក Irakli Garibashvili បានព្យាករថា គណបក្ស Georgian Dream នឹងឈ្នះការបោះឆ្នោតសភាដែលគ្រោងធ្វើនៅខែតុលា «ដោយទទួលបានសំឡេងគាំទ្រយ៉ាងច្រើនសន្ធឹកសន្ធាប់» ជាមិនខាន។

ការស្ទង់មតិបង្ហាញថា គណបក្ស Georgian Dream នៅតែជាគណបក្សដែលមានប្រជាប្រិយបំផុតរបស់ប្រទេស ប៉ុន្តែបានបាត់បង់ការគាំទ្រមូលដ្ឋាន ចាប់តាំងពីឆ្នាំ២០២០ នៅពេលដែលខ្លួនបានឈ្នះសំឡេងភាគច្រើនស្ដួចស្ដើង នៅក្នុងសភា៕