ត្បូងឃ្មុំ ៖ ក្រុមការងារគណៈកម្មការទប់ស្កាត់ និងការឈូសឆាយទន្រ្ទានយកដីព្រៃលិចទឹក ក្នុង​ភូមិសាស្ត្រ​ស្រុកក្រូចឆ្មារ ដឹកនាំដោយលោក សាំង សែន សមាជិកគណៈកម្មការ និងជា​ប្រធាន​ការិយាល័យ​ប្រជាពលរដ្ឋ ខេត្តត្បូងឃ្មុំ នៅថ្ងៃទី០២ ខែកុម្ភៈ ឆ្នាំ២០២៤ បាននាំយកអង្ករចំនួន ៤០០​គីឡូក្រាម និងថវិការបស់ឯកឧត្តមបណ្ឌិតអភិបាលខេត្ត ចំនួន ៨លានរៀល ជូន​ដល់​កម្លាំង​ចំរុះទាំងបីប្រភេទ នៅចំនួន៤ទីតាំងក្នុងភូមិសាស្ត្រ​ស្រុក​ក្រូចឆ្មារ ខេត្តត្បូងឃ្មុំ ដែលកំពុងឈរ​ជើង​ការពារ​ និងទប់ស្កាត់ជនខិតខូចដែលមានបំណង​មកកាប់ទន្ទ្រានតំបន់ព្រៃលិចទឹក។

លោក សាំង សែន មានប្រសាសន៍ថា ដើម្បីការពារផលប្រយោជន៍រួមឯកឧត្តមបណ្ឌិត ជាម ច័ន្ទសោភ័ណ អភិបាលខេត្ត បានដាក់ចេញវិធានការយ៉ាងតឹងរឹង និងម៉ឹងម៉ាត់បំផុត ក្នុង​ការ​ទប់ស្កាត់​ជនខិលខួច​ដែល​មាន​បំណង​មក​ឈួស​ឆាយ​រំលោភ​យក​ដីព្រៃលិច​ទឹក​ក្នុង​ភូមិ​សាស្ត្រ​ស្រុក​ក្រូចឆ្មារ ដោយបានដាក់កម្លាំការពារជាប្រចាំចំនួន ៤ទីតាំង។ ជាការ​លើក​ទឹកចិត្ត​ចំពោះ​បងប្អូន​​​ដែល​មកឈេជើងឯកឧត្តមបណ្ឌិត ក៏បានរៀបចំអង្ករ និងថវិការ មួយ​ចំនួន​មក​ប្រគល់​ជូន​កង​កម្លាំង​ទាំង​៣ប្រភេទដោយក្នុង១ទីតាំងទទួលបានថវិការ ២លានរៀនជារៀងរាល់ខែ រួមទាំង​អង្ករផងដែរ ។

សូមជម្រាបថា កាលពីថ្ងៃសៅរ៍ ទី២៨ ខែមករា ឆ្នាំ២០២៤ រដ្ឋបាលខេត្ដត្បូងឃ្មុំ បាន​ចេញសេ​ចក្ដី​ជូន​ដំណឹងស្ដីពីការទប់ស្កាត់ និងការឈូសឆាយទន្ទ្រានយកដីព្រៃលិចទឹក មានចំនួន ៩ ឃុំ ក្នុង​ចំណោម ១២ឃុំ ក្នុងស្រុកក្រូចឆ្មារ ខេត្ដត្បូងឃ្មុំ និងបានរៀបចំកម្លាំងចំរុះ ដែល​ត្រូវ​ឈរ​ជើង​ល្បាត​ជា​ប្រចាំ​តាមបណ្តាទីតាំងសំខាន់ៗចំនួន ៤ រួមមាន ទីតាំងទី១៖ ឃុំក្របីក្រៀក (គ្រប់ដណ្តប់ ឃុំឈូក និងឃុំជំនីក , ទីតាំងទី២៖ តំបន់ពស់អំបែង គ្រប់ដណ្តប់ឃុំទួលស្នួល , ទីតាំងទី៣៖ តំបន់ចម្ការចិន គ្រប់ដណ្តប់ ឃុំ ប៉ើស១ ឃុំប៉ើស២ និងឃុំស្វាយឃ្លាំង និងទីតាំងទី៤ តំបន់​ខ្នងព្រែក គ្រប់ដណ្តប់ ឃុំក្រូចឆ្មារ ឃុំទ្រា និងឃុំព្រែកអាជី។

ប្រសិន​បើមានបទល្មើសកើតឡើង គឺកងកម្លាំងប្រដាប់អាវុធទាំង៣ប្រភេទ ដែលមាន​សមាសភាព​៧នាក់ ក្នុងមួយទីតាំង គឺមានសិទ្ធិពេញលេញ ក្នុងការបង្ក្រាប និងចាប់ខ្លួន ទៅតាម​វិធានការ​ច្បាប់។ ជាមួយគ្នានោះអាជ្ញាធរមូលដ្ឋាន ត្រូវ​តែជួយ​ការពារ​ទប់ស្កាត់​ការ​ទន្ទ្រាន​ទៅ​លើ​ដី​នៅ​ក្នុង​ភូមិសាស្ត្រ​ស្រុកក្រូចឆ្មារ ដើម្បីអភិរក្សធនធានធម្មជាតិ និងជីវសាស្ត្រ​ចម្រុះ​នានា​នៅ​តំបន់​ព្រៃលិច​ទឹកឱ្យបានគង់វង្ស ទុកសម្រាប់បម្រើជាឧត្តមប្រយោជន៍សាធារណៈ។

ជាមួយគ្នានោះ ដើម្បីរក្សាផលប្រយោជន៍រួម អាជ្ញាធរ​ខេត្តត្បូងឃ្មុំ​បាន​អំពាវនាវ​ដល់​បង​ប្អូន​ប្រជា​ពលរដ្ឋ​ទាំង​អស់អស់ពិសេសបងប្អូនក្នុងស្រុកក្រូចឆ្មារ សូមមេត្តាចូលរួមទប់ស្កាត់ទាំងអស់គ្នា ដោយ​មិន​ត្រូវឆ្លៀតឱកាសចូលទន្ទ្រានយកធ្វើជាកម្មសិទ្ធិនោះទេ ព្រោះថា បើនៅតែបំពាន គឺ​ប្រាកដ​ជាត្រូវចាប់ខ្លួនដោយគ្មានការលើកលែង ដើម្បីផ្តន្ទាទោសតាមផ្លូវច្បាប់៕