ប្រធានាធិបតីបារាំង លោក Emmanuel Macron បាននិយាយនៅក្នុងទីក្រុងព្រុចសែល កាល​ពី​ថ្ងៃ​ព្រហស្បតិ៍ថា វិស័យកសិកម្មរបស់អឺរ៉ុប កំពុងប្រឈមមុខទៅនឹងវិបត្តិដ៏ធំ ហើយចាំបាច់​ត្រូវ​ផ្លាស់​ប្តូរ​វិធានការរបស់ខ្លួន ដោយបញ្ជាក់ជាថ្មីថា ទីក្រុងប៉ារីស ប្រឆាំង​ការចុះកិច្ច​ព្រម​ព្រៀង​ពាណិជ្ជ​កម្មសេរី ប្លុកពាណិជ្ជកម្មអាមេរិកខាងត្បូង ជាមួយបណ្តាប្រទេសនៅអាមេរិកឡាទីន។

ថ្លែង បន្ទាប់ពីកិច្ចប្រជុំកំពូលរបស់មេដឹកនាំសហភាពអឺរ៉ុបនៅទីក្រុងប្រ៊ុចសែល ដែលត្រូវ​បាន​គ្រប​ដណ្ដប់​ដោយ​ការតវ៉ាដ៏ខ្លាំងក្លា ធ្វើឡើងដោយកសិករមកពីទូទាំងទ្វីប លោក Macron បាន​និយាយ​ថា សហភាពអឺរ៉ុប ក៏ត្រូវការយន្តការរួមគ្នាមួយ ដើម្បីធានា​បាន​អ្នក​លក់​រាយ​ក្នុង​តម្លៃ​សមរម្យ ហើយក្រុមហ៊ុនអាហារធំៗបង់ប្រាក់ទៅឱ្យអ្នកផលិត។

លោក Macron បាននិយាយថា ប្រទេសបារាំងទទួលបានវិធានការការពារ ដែលនឹង​ជួយ​ដល់​កសិករ​បារាំង ក្នុងករណី​មាន​ការ​ប្រកួត​ប្រជែង​មិន​យុត្តិធម៌​ជាមួយ​នឹង​ការ​នាំចូល​របស់​ប្រទេស​អ៊ុយក្រែន ជាពិសេស គ្រាប់ធញ្ញជាតិ។

លោក​បានអំពាវនាវឱ្យមានតម្រូវការ សម្រាប់ត្រឡប់ទៅរកភាពស្ងប់ស្ងាត់វិញ បន្ទាប់ពី​ជា​ច្រើន​ថ្ងៃ​នៃ​ការ​បិទផ្លូវធំ និងសកម្មភាពតវ៉ាធ្វើឡើងដោយកសិករបារាំងដែលខឹងសម្បារ ដោយនិយាយថា​ពួក​គេមិនទទួលបានប្រាក់គ្រប់គ្រាន់ ដែលត្រូវបានរារាំងដោយការបង់ពន្ធ ច្បាប់បរិស្ថាន និង​ប្រឈម​មុខ​ទៅនឹងការប្រកួតប្រជែងមិនយុត្តិធម៌ពីបរទេស។

មេដឹកនាំ សហជីពកសិករសំខាន់ៗរបស់ប្រទេសបារាំង កាលពីថ្ងៃព្រហស្បតិ៍ បានអំពាវនាវ​ដល់​អ្នក​ចូលរួម ឱ្យលុបចោល​ការបិទ​ផ្លូវ​ដែល​បាន​រំខាន​ចរាចរណ៍​នៅ​ទូទាំង​ប្រទេស​អស់​រយៈពេល​ជាង​ពីរ​សប្តាហ៍​ដោយនិយាយថារដ្ឋាភិបាល បានស្តាប់ការតវ៉ា ហើយវាដល់ពេល​ដែល​ត្រូវ​ត្រឡប់​ទៅ​លំនៅ​ឋាន​វិញ៕