មេដឹកនាំក្រុម លោក អាប់ដែល ម៉ាឡេក អាល់ ហ៊ូទី(Abdel-Malek al-Houthi) បាន​និយាយ​កាល​ពីថ្ងៃព្រហស្បតិ៍ថា ការប៉ុនប៉ងរបស់សហរដ្ឋអាមេរិក ក្នុងការស្វែងរកជំនួយ​ពីប្រទេសចិន សម្រាប់​ការ​សម្របសម្រួល ដើម្បីបញ្ឈប់ក្រុមហ៊ូទីនៅប្រទេសយេម៉ែន ដែលដាក់គោលដៅ​លើ​នាវា​​ដែល​មានទំនាក់ទំនងជាមួយប្រទេសអ៊ីស្រាអែលនៅសមុទ្រក្រហម បង្ហាញ​ថា​សហរដ្ឋ​អាមេរិក និងចក្រភពអង់គ្លេស បានបរាជ័យក្នុងបេសកកម្មរបស់ពួកគេ។

មេដឹក​នាំក្រុមហ៊ូទី និយាយក្នុងសុន្ទរកថាតាមទូរទស្សន៍ថា សញ្ញា​មួយ​ក្នុង​ចំណោម​សញ្ញា​នៃ​ការបរាជ័យ គឺការប៉ុនប៉ងរបស់អាមេរិក ក្នុងការស្វែងរកជំនួយពីប្រទេសចិន ដើម្បីសម្របសម្រួល និង​បញ្ចុះបញ្ចូលពួកយើង ឱ្យបញ្ឈប់ប្រតិបត្តិការគាំទ្ររបស់យើងសម្រាប់ប្រជាជនប៉ាឡេស្ទីន ការ​ប្រឆាំង​នាវាអ៊ីស្រាអែល និងអ្នកទាំងឡាយណាដែលជាប់ពាក់ព័ន្ធជាមួយសត្រូវអ៊ីស្រាអែល។

ក្រុមសកម្មប្រយុទ្ធហ៊ូទីដែលជាសម្ព័ន្ធមិត្តអ៊ីរ៉ង់ គ្រប់គ្រង​ផ្នែក​ដែល​មាន​ប្រជាជន​រស់​នៅ​ច្រើន​បំផុត​ក្នុង​ប្រទេសយេម៉ែន បានចាប់ផ្តើមរលកនៃការបំផ្ទុះយានដ្រូន និងមីស៊ីល​ទៅ​លើ​នាវា​ពាណិជ្ជកម្ម​នៅ​សមុទ្រក្រហម និងនៅឈូងសមុទ្រ Aden ក្នុងប៉ុន្មានសប្តាហ៍ថ្មីៗនេះ ដោយចាត់​ទុកថា​វា​ជា​ការ​ឆ្លើយ​តបចំពោះប្រតិបត្តិការយោធារបស់អ៊ីស្រាអែលនៅតំបន់ហ្កាហ្សា និងការ​បង្ហាញ​ពី​សាមគ្គីភាព​ចំពោះពលរដ្ឋប៉ាឡេស្ទីន។

យុទ្ធនាការ​ក្រុមហ៊ូទី បានបង្អាក់ដល់ការដឹកជញ្ជូនជាអន្តរជាតិ។ សហរដ្ឋអាមេរិក និងចក្រភព​អង់គ្លេស​បាន​បើកការវាយប្រហារលើគោលដៅក្រុមហ៊ូទី ក្នុងប្រទេសយេម៉ែន ហើយបាន​ដាក់​កង​ជីវពល​ទៅ​ក្នុងបញ្ជីក្រុមភេរវកម្ម៕