បុគ្គលស្វ័យនិយោជន៍រាប់ពាន់នាក់ កំពុងទទួលបានអត្ថប្រយោជន៍ពីកម្មវិធី បេឡាជាតិ​របប​សន្ដិសុខ​សង្គមរបស់រាជរដ្ឋាភិបាល ខណៈគិតត្រឹមដើមខែកុម្ភៈនេះ រដ្ឋចំណាយប្រាក់​ផ្នែក​សេវា​ថែទាំ​សុខ​ភាព សម្រាប់បុគ្គលស្វ័យនិយោជន៍ចំនួន ១ ៤១៥,៥០ លានរៀល។

ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ប្រាប់ទូរទស្សន៍ព័ត៌មាន ប៊ីធីវី ឲ្យដឹងថា គិតមកដល់ពេលនេះ បេឡាជាតិ​សន្តិសុខ​សង្គម (ប.ស.ស.) បានចុះឈ្មោះសមាជិក សរុបចំនួនជាង ១៣ ម៉ឺននាក់ ក្នុង​នោះ​បុគ្គល​ស្វ័យ​និយោជន៍ចំនួនជាង ១១ ម៉ឺននាក់ និងអ្នកក្នុងបន្ទុកសមាជិក ប.ស.ស. ចំនួនជិត ២ ម៉ឺននាក់។ ឯកឧត្តម បានឲ្យដឹងទៀតថា សមាជិក ប.ស.ស. ផ្នែកថែទាំសុខភាព​តាមរបបភាគ​ទាន​ដោយស្ម័គ្រចិត្ត ដែលបានទៅប្រើប្រាស់សេវាសុខាភិបាលមានចំនួនជាង ៧ម៉ឺន ៤ពាន់ដង។

អ្នកស្រី សុគន្ធា ជាអាជីករលក់ទំនិញតាមប្រព័ន្ធអនឡាញ ក៏ដូចជាបុគ្គលស្វ័យនិយោជន៍ដទៃផ្សេងទៀត បានឲ្យ ប៊ីវីធី ដឹងនៅព្រឹកថ្ងៃទី២ ខែកុម្ភៈនេះថា ពួកគាត់​ពិតជាសប្បាយចិត្តជាខ្លាំង ព្រោះមិនធ្លាប់នឹកស្មានថា ត្រឹមជាពលរដ្ឋធម្មតា​មាន​មុខ​របរ​តិចតួច ក៏អាចទទួលបានសិទ្ធិក្នុងការស្នើសុំបណ្ណ័សមាជិក ប.ស.ស. បានដែរ។ ពួកគាត់​បាន​លើក​ឡើង​ស្រដៀងគ្នាទៀតថា ប័ណ្ណ ប.ស.ស. នេះ ពិតជាសំខាន់ណាស់ ព្រោះអាច​ជួយ​សម្រាល​លើ​បន្ទុកចំណាយបានច្រើនណាស់ នៅពេលគាត់ឈឺត្រូវទៅពេទ្យ ហើយចំណាយ​ត្រឹមតែ ១៥,៦០០ រៀលប៉ុណ្ណោះ ក្នុង១ខែ ខណៈសព្វថ្ងៃជីវភាពគ្រួសារមានការខ្វះខាត ទៅ​ពេទ្យ​ម្តង​ៗ​ត្រូវចំណាយច្រើន។

យោងតាមអនុក្រឹត្យ ២៨០អនក្រ.បក ចុះថ្ងៃទី២៨ ខែសីហា ឆ្នាំ២០២៣ ស្តីពីលក្ខខណ្ឌបែបបទ និង​នីតិវិធីនៃការអនុវត្តរបបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្ត ចំនួន ១៥ ៦០០ រៀល ក្នុង១ខែ រាជរដ្ឋាភិបាល នឹងផ្តល់ជូន​នូវ​ប្រាក់​បំណាច់​ពេល​ឈប់​សម្រាក​ពេល​មានជំងឺ លើកាវតាលិកអប្បបរមា ដូចដែលរៀបរាប់ខាងលើបន្ថែម។ ក្រៅពីនេះ យោង​តាម​ច្បាប់​ស្តីពីរបបសន្តិសុខសង្គម មាត្រា៣៦ និងមាត្រា៥៦ បានចង្អុល​ឲ្យ​មាន​របប​សន្តិសុខស​ង្គម២​គឺ​៖ របបសន្តិសុខសង្គម ផ្នែកថែទាំងសុខភាព និងរបបសន្តិសុខសង្គមផ្នែកប្រាក់សោធន ដូចនេះ ទៅ​ថ្ងៃអនាគតច្បាស់ណាស់ បុគ្គលស្វ័យនិយោជន៍ ក៏នឹងទទួលបាននូវរបបប្រាក់សោធន ដូចគ្នា​ទៅ​នឹង​កម្មករ និយោជិត ក៏ដូចជាមន្រ្តីរាជការដូចគ្នាដែរ៕ អត្ថបទ៖ឈិត បូរ៉ាវី