សហរដ្ឋអាមេរិក កាលពីថ្ងៃព្រហស្បតិ៍ បានដាក់ទណ្ឌកម្មលើអ្នកតាំងលំនៅអ៊ីស្រាអែល ៤ នាក់ ខណៈ​ប្រធានាធិបតី លោក Joe Biden បាននិយាយថា អំពើហិង្សាលើជនស៊ីវិល​ប៉ាឡេស្ទីន​នៅ​តំបន់ West Bank បានឈានដល់កម្រិតដែលមិនអាចអត់ឱនឲ្យបាន។ ការដាក់ទណ្ឌកម្មនេះ បាន​កត់សម្គាល់ពីចំណាត់ការដ៏កម្ររបស់សហរដ្ឋអាមេរិកទៅលើប្រជាជនអ៊ីស្រាអែល ខណៈ​សង្រ្គាម​ផ្ទុះ​រាលដាលជាមួយក្រុមហាម៉ាសនៅតំបន់ហ្កាហ្សា។

វាបានកើតឡើង នៅពេលលោក Biden បានធ្វើដំណើរទៅកាន់រដ្ឋ Michigan ជាកន្លែង​ដែល​មនុស្ស​ជា​ច្រើន​នៅក្នុ​ង​សហគមន៍​អាមេរិក​អារ៉ាប់​ដ៏ច្រើន បានសម្តែងការ​ខឹងសម្បារ​ចំពោះ​ការ​គាំទ្រ​របស់​លោក​ចំពោះ​ប្រទេស​អ៊ីស្រាអែល។ លោក Biden បាននិយាយពីបទបញ្ជាប្រតិបត្តិ ដែលដាក់​ការងារ​មូលដ្ឋាន​ សម្រាប់​សកម្មភាព​របស់សហរដ្ឋអាមេរិកថា ស្ថានភាពនៅតំបន់ West Bank ស្ថិតក្នុងកម្រិត​មួយ​ខ្ពស់​នៃ​អំពើ​ហឹង្សា​ជ្រុល​របស់អ្នកតាំងទីលំនៅ បង្ខំឱ្យមនុស្សជាច្រើនភៀសខ្លួន និងបានបំផ្លិច​បំផ្លាញ​ទ្រព្យ​សម្បត្តិ ដែលបានឈានដល់កម្រិតមិនអាចអត់ឱនឲ្យបាន ហើយបង្កើត​ជា​ការ​គំរាម​កំហែង​ធ្ងន់​ធ្ងរ​ដល់សន្តិភាព សន្តិសុខ និងស្ថិរភាព។

ក្រសួងការបរទេស បានប្រកាស​ដាក់​ទណ្ឌ​កម្ម​លើ​អ្នក​តាំង​លំ​នៅ​ចំនួនបួននាក់ ដែលទ្រព្យសកម្មណាមួយដែលពួកគេមាននៅសហរដ្ឋអាមេរិក នឹង​ត្រូវ​បាន​បិទ ដោយជនជាតិ​អាមេរិក​ត្រូវ​បាន​ហាម​ឃាត់​មិន​ឱ្យ​ធ្វើ​ប្រតិបត្តិការ​ហិរញ្ញវត្ថុ​ជា​មួយ​ពួក​គេ។​ រដ្ឋមន្ត្រីក្រសួងការបរទេស លោក Antony Blinken ដែលបាន​លើក​ឡើង​ម្តង​ហើយ​ម្តង​ទៀត​អំពី​អំពើហឹង្សាជាមួយអ៊ីស្រាអែល ថា អ៊ីស្រាអែល ត្រូវតែធ្វើការងារបន្ថែមទៀត ដើម្បី​បញ្ឈប់​អំពើ​ហិង្សា​លើជនស៊ីវិលនៅតំបន់ West Bank។ លោក Blinken បានព្រមាន​ប្រឆាំង​ទៅ​នឹង​សកម្មភាព​ដែលបង្កគ្រោះថ្នាក់ដល់ការបង្កើតរដ្ឋប៉ាឡេស្ទីន ជាយថាហេតុ ជាគំនិតមួយ​ដែល​ត្រូវ​បាន​ប្រឆាំងយ៉ាងខ្លាំងដោយរដ្ឋាភិបាលស្តាំនិយមរបស់នាយករដ្ឋមន្ត្រី លោក Benjamin Netanyahu រួមមានទាំងអ្នកគាំទ្រអ្នកមកតាំងលំនៅ។ អ៊ីស្រាអែល បានរិះគន់​ការ​ដាក់​ទណ្ឌកម្ម​ដោយ​សម្ព័ន្ធ​មិត្តជិតស្និទ្ធរបស់ខ្លួនដោយនិយាយថា ពលរដ្ឋរបស់ខ្លួន ភាគច្រើន នៅក្នុងតំបន់ West Bank គឺគោរពច្បាប់៕