ប្រជាជនអ៊ីស្រាអែល ជាច្រើនបានតវ៉ានៅទីក្រុង តែលអាវីវ (Tel Aviv) កាលពីថ្ងៃព្រហស្បតិ៍ (០១ កុម្ភៈ) ដោយអំពាវនាវឱ្យមានការដោះលែងចំណាប់ថ្នូរហ្កាហ្សា ជាបន្ទាន់។ ពួក​គេ​បាន​ប្រមូល​ផ្តុំគ្នា​នៅជិតទីស្នាក់ការក្រសួងការពារជាតិអ៊ីស្រាអែល ជាទីដែលនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) កំពុងប្រជុំគណៈរដ្ឋមន្ត្រី។

ក្រុមបាតុករបានគ្រវីទង់ជាតិអ៊ីស្រាអែល ស្រែកពាក្យស្លោក និង​កាន់​ផ្ទាំង​រូបភាព​ដែល​មាន​រូបថត​មនុស្ស​មួយ​ចំនួនក្នុងចំណោមចំណាប់ថ្នូរ ១៣៦ នាក់ ដែលនៅតែត្រូវ​បាន​ឃុំខ្លួន​នៅ​តំបន់​ហ្កាហ្សា ចាប់តាំងពីថ្ងៃទី០៧ ខែតុលា មក។ ស្ទើរតែរាល់ថ្ងៃនៅក្នុងទីក្រុង តែលអាវីវ ក្រុម​គ្រួសារ​ចំណាប់​ថ្នូរ និងអ្នកគាំទ្ររបស់ពួកគេបានប្រមូលផ្តុំគ្នាតវ៉ាដោយបិទចរាចរណ៍ ខណៈពួក​គេ​ទាមទារ​ឲ្យ​មានការត្រឡប់មកវិញរបស់មនុស្សជាទីស្រឡាញ់របស់ពួកគេ។

ស្ទើរ​តែ​ពាក់កណ្តាលនៃចំណាប់ថ្នូរទាំងអស់ ត្រូវបានដោះលែងដោយក្រុមហាម៉ាស ក្នុងអំឡុង​ពេល​បទ​ឈប់បាញ់ក្នុងខែវិច្ឆិកា ខណៈដែលអ៊ីស្រាអែល បានដោះលែង​អ្នក​ទោស​ប៉ាឡេស្ទីន​រាប់​រយ​នាក់​។ កិច្ចខិតខំប្រឹងប្រែងការទូតកំពុងបន្តដើម្បីទទួលបានបទឈប់បាញ់មួយផ្សេងទៀត ដែល​នឹងអនុញ្ញាតឱ្យមានចំណាប់ថ្នូរកាន់តែច្រើនត្រូវបានដោះលែង៕