កំពង់ធំ៖ ក្រសួងធនធានទឹក បើកការដ្ឋានសាងសង់គម្រោងអភិវឌ្ឍន៍ទំនប់ស្ទាក់ទឹក និង​អាង​ទឹក​ដង​កាំបិត ស្ថិតនៅភូមិស្រែខ្សាច់ ឃុំដងកាំបិត ស្រុកសណ្ដាន់ ខេត្តកំពង់ធំ ដែលមាន​ធារ​ទឹក​ប្រមាណ​ ៣០៨ លានម៉ែត្រគូប និងអាចស្រោចស្រពលើផ្ទៃដីជាង១៣ហិកតា។

នៅថ្ងៃទី១ ខែកុម្ភៈ ឆ្នាំ២០២៤ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បើក​ការដ្ឋានសាងសង់គម្រោងអភិវឌ្ឍន៍អាងទឹកដងកាំបិត ស្ថិតក្នុងភូមិស្រែខ្សាច់ ឃុំដងកាំបិត ស្រុក​សណ្តាន់ ខេត្តកំពង់ធំ ។ ក្នុងឱកាសនោះ ឯកឧត្តម រដ្ឋមន្ត្រីក្រសួងធនធានទឹក និង​ឧតុនិយម លើកឡើងថា គម្រោងអភិវឌ្ឍន៍ទំបន់អាងស្ទាក់ទឹកនេះ គឺទំនប់អាងទឹកប្រភពធំមួយ របស់​ទឹកស្ទឹងសែន ក្រោមហិរញ្ញប្បទានសម្បទានពីធនាគារ អាហរ័ណ នីហរ័ណចិន (EXIMBANK) តាមរយៈក្រសួងសេដ្ឋកិច្ច និងហិរញ្ញវត្ថុកម្ពុជា។ ឯកឧត្តមបន្តថា ទីតាំងនេះ គឺប្រភពទឹកដ៏សំខាន់ នៃលំហូរទឹកស្ទឹងសែន ហូរកាត់ខេត្តព្រះវិហារ និងខេត្តកំពង់ធំ ក្នុងភាគ​ខាង​ជើង​ប្រទេស​កម្ពុជា ដែលមានប្រវែងសរុប ៣២០ គីឡូម៉ែត្រ។ ហើយទំនប់អាងទឹកដងកាំបិទនេះ ស្ថិត​នៅ​ក្នុងឃុំដងកំបោរ ស្រុកសណ្តាន់ ខេត្តកំពង់ មានចម្ងាយប្រមាណ ២៨ គីឡូម៉ែត្រ ខាងលើ​នៃ​ស្រុកសណ្ដាន់។ ទំហំធារទឹកអាចផ្ទុកបាន រហូតទៅដល់ ជាង៣០៨ លានម៉ែត្រគូប និង​ស្រោច​លើ​ផ្ទៃ​ដី​ប្រមាណជាង១៣ហិកតា។

ឯកឧត្តមបញ្ជាក់ថា ការសាងសង់ និងអភិវឌ្ឍន៍​អាងទឹក​ដង​កាំបិត​នា​ពេល​នេះបានបង្ហាញពីការយកចិត្តទុកដាក់របស់រាជរដ្ឋាភិបាល ក្រោមការ ដឹកនាំប្រកប​ដោយ​ភាព​ឈ្លាសវៃ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា ក្នុងការគ្រប់​គ្រង​ទឹក បញ្ជាទឹក ដើម្បីធានាផ្គត់ផ្គង់ទឹកសម្រាប់ស្រោចស្រពផ្ទៃដីកសិកម្មនៅផ្នែកខាងក្រោម បង្កើន​ផលិតកម្មស្បៀង ព្រមទាំងធានាទឹកសម្រាប់ប្រើប្រាស់ក្នុងជីវភាពរស់នៅប្រចាំថ្ងៃ និងក្នុង​ផ្នែកឧស្សាហកម្ម កសិកម្ម ដែលជាផ្នែកមួយជួយលើកស្ទួយដល់គោលនយោបាយជាតិ ស្តីពីសន្តិ​សុខ​ស្បៀងប្រ​កបដោយប្រសិទ្ធភាព ក្នុងដំណាក់កាលនៃការប្រែប្រួលអាកាសធាតុ។ ចំពោះ​ការ​សាងសង់ នឹងប្រើរយៈពេល ៤៨ខែ ដោយគិតចាប់ពីថ្ងៃទី៤ ខែធ្នូ ឆ្នាំ២០២៣មក។ ក្នុងនោះ​ក៏​មាន​ការ​សាងសង់ខ្នងទំនប់សរុបប្រវែងជាង ២ ៦៨០ម៉ែត្រ ដែលរួមមាន​ទំនប់​ដី​ខាង​ឆ្វេង​ប្រវែង​ជាង ១ ១៣៦ម៉ែត្រ ទំនប់បង្ហៀរទឹកប្រវែង ៣០៦ម៉ែត្រ ទំនប់បេតុងប្រវែង៥០ម៉ែត្រ និង​ទំនប់​ដី​ខាង​ស្តាំ​ប្រវែង​ជាង ១ ១៨៨ម៉ែត្រ ខ្នងទំនប់មានកម្ពស់ ៤០ម៉ែត្រធៀបនឹងនីវ៉ូទឹកសមុទ្រ។ ក្រោយ​ការ​សាងសង់ទំបន់អាងស្តុកនេះរួច នឹងមានប្រជាពលរដ្ឋប្រមាណ ២៥,០០០គ្រួសារ ស្មើនឹង ៨៥ ៣០០នាក់ រស់នៅក្នុងស្រុកបារាយណ៍ ស្រុកសណ្តាន់ ស្រុកសន្ទុក ស្រុកស្ទោង ស្រុក​កំពង់ស្វាយ និងស្រុកប្រាសាទសំបូរ នៃខេត្តកំពង់ធំ ទទួលផលពីការអភិវឌ្ឍអាងនេះ៕