ប្រមុខការទូតរបស់ចក្រភពអង់គ្លេស បាននិយាយកាលពីថ្ងៃព្រហស្បតិ៍ថា ប្រទេសរបស់លោក អាច​ទទួលស្គាល់រដ្ឋប៉ាឡេស្ទីនជាផ្លូវការ បន្ទាប់ពីបទឈប់បាញ់នៅតំបន់ហ្កាហ្សា ដោយ​មិន​រង់ចាំ​លទ្ធផល នៃ​អ្វីដែលអាចជាកិច្ចចរចារយៈពេលជាច្រើនឆ្នាំរវាងអ៊ីស្រាអែល និងប៉ាឡេស្ទីន​លើ​ដំណោះ​ស្រាយ​រដ្ឋពីរ។

រដ្ឋមន្ត្រីការបរទេសលោក ដេវីត កាមេរូន (David Cameron) ដែលថ្លែងទៅកាន់សារព័ត៌មាន AP ក្នុងអំឡុងពេលទស្សនកិច្ចកាលពីថ្ងៃព្រហស្បតិ៍ទៅកាន់ប្រទេសលីបង់ ក្នុងគោល​បំណង​កាត់​បន្ថយ​ភាព​តានតឹងក្នុងតំបន់ បាននិយាយថា គ្មានការទទួលស្គាល់ណាមួយ អាចកើត​មាន​ឡើង​ទេ ខណៈដែលក្រុមហាម៉ាស នៅតែស្ថិតក្នុងតំបន់ហ្កាហ្សា ប៉ុន្តែវាអាចកើតឡើង ខណៈពេល​ដែល​ការ​ចរចា​របស់អ៊ីស្រាអែលជាមួយមេដឹកនាំប៉ាឡេស្ទីន កំពុងបន្ត។

លោកកាមេរូន អតីតនាយករដ្ឋមន្ត្រីអង់គ្លេស បាននិយាយថា ការទទួលស្គា​ល់រ​បស់​ចក្រ​ភព​អង់គ្លេស​ចំពោះ​រដ្ឋឯករាជ្យមួយរបស់ប៉ាឡេស្ទីន រួមទាំងនៅក្នុងអង្គការសហប្រជាជាតិ «មិន​អាច​កើត​ឡើង នៅពេលចាប់ផ្តើមដំណើរការនោះទេ ប៉ុន្តែវាមិន​ចាំ​បាច់​ជា​ចុង​បញ្ចប់​នៃ​ដំណើរ​ការ​នោះ​ទេ»។

លោកបានថ្លែងថា៖«វាអាចជាអ្វីមួយដែលយើងចាត់ទុកថាជាដំណើរការនេះ ដោយសារ​ការ​ឈាន​ទៅ​រក​ដំណោះស្រាយ ក្លាយជាការពិត»។ «អ្វីដែលយើងត្រូវធ្វើ គឺផ្តល់ឲ្យ​ប្រជាជន​ប៉ាឡេស្ទីន​នូវ​ឱកាស​ឆ្ពោះ​ទៅរកអនាគតដ៏ល្អប្រសើរ អនាគតនៃការមានរដ្ឋផ្ទាល់ខ្លួនរបស់ពួកគេ»។

លោក​កាមេរូន បានបន្តថា ការរំពឹងទុកនោះ មានសារៈសំខាន់ខ្លាំងណាស់សម្រាប់សន្តិភាព និង​សន្តិសុខ រយៈពេលវែងនៃតំបន់នេះ។

ចក្រភព​អង់គ្លេស សហរដ្ឋអាមេរិក និងបណ្តាប្រទេសលោកខាងលិចផ្សេងទៀត បានគាំទ្រ​គំនិត​នៃ​ប៉ាឡេស្ទីនឯករាជ្យដែលមានជាមួយអ៊ីស្រាអែល​ជា​ដំណោះ​ស្រាយ​ចំពោះ​ជម្លោះ​ដ៏គួរ​ឲ្យ​ធុញ​ទ្រាន់​បំផុត នៅក្នុងតំបន់ ប៉ុន្តែបាននិយាយថា ឯករាជ្យភាពប៉ាឡេស្ទីន គួរតែមកជាផ្នែក​នៃ​ការ​ចរចា​រក​ដំណោះស្រាយ ដោយសារពុំ មានការចរចាធំដុំទេ ចាប់តាំងពីឆ្នាំ ២០០៩មក៕