ប្រទេសជប៉ុន ដែលជាសម្ព័ន្ធមិត្តជិតស្និទ្ធបំផុតរបស់អាមេរិកនៅអាស៊ី បាន​និង​កំពុង​ព្យាយាម​ផ្ញើ​សារ​​ទៅកាន់បេក្ខជនប្រធានាធិបតីអាមេរិកនាំមុខ លោក ដូណាល់ ត្រាំ (Donald Trump) ថា កុំព្យាយាមធ្វើកិច្ចព្រមព្រៀងណាមួយជាមួយប្រទេសចិន ដែលអាច​ប៉ះពាល់​ដល់​កិច្ច​ខិតខំ​ប្រឹង​ប្រែង​រួម​ជាច្រើនឆ្នាំ ក្នុងការដាក់កម្រិតលើទីក្រុងប៉េកាំង ហើយ​បង្កហានិភ័យ​ដល់​សន្តិភាព​ដ៏​ផុយ​ស្រួយ​របស់តំបន់។

ទីក្រុងតូក្យូ បានបង្កើនការប៉ុនប៉ងដើម្បីចូលរួមជាមួយមនុស្សជិតស្និទ្ធនឹងលោក ត្រាំ ក្នុងប៉ុន្មាន​សប្តាហ៍​ថ្មី​ៗនេះ ខណៈដែលជ័យជម្នះរបស់បេក្ខជនប្រធានាធិបតីអាមេរិកនាំមុខ វ័យ ៧៧ឆ្នាំ រូប​នេះ​នៅ​ក្នុងការបោះឆ្នោតបឋមរបស់គណបក្សសាធារណរដ្ឋនៅរដ្ឋ អ៊ីអូវ៉ា (Iowa) និងរដ្ឋ ញ៉ូវ​ហែម​សៀរ ( New Hampshire) បានមើលឃើញថា លោក ត្រាំ បាន​លេច​ចេញ​នៅ​ក្នុង​ការ​ស្ទង់​មតិ​មួយ​ចំនួនក្នុងនាមជាអ្នកនាំមុខនៅក្នុងការបោះឆ្នោតប្រធានាធិបតីខែវិច្ឆិកា ខាងមុខនេះ។

ការ​ប៉ុនប៉ងទាក់ទងជាមួយលោក ត្រាំ ដែលរៀបរាប់​លម្អិត​នៅ​ក្នុង​បទ​សម្ភាសន៍​ជា​មួយ​មន្ត្រី​ជប៉ុន​ចំនួ​ន​ប្រាំមួយរូប នេះបានកើតឡើងនៅពេលដែលលោកនាយករដ្ឋមន្ត្រី ហ្វ៊ូមីអូ គីស៊ីដា (Fumio Kishida) រៀបចំសម្រាប់ដំណើរទស្សនកិច្ចផ្លូវរដ្ឋនៅខែមេសា ខាងមុខទៅកាន់សហរដ្ឋអាមេរិក តា​ម​ការ​អញ្ជើញ​របស់​លោកប្រធានាធិបតី ចូ បៃដិន (Joe Biden)។

បញ្ហាចម្បង នៃបញ្ជីកង្វល់របស់ទីក្រុងតូក្យូ គឺថាប្រសិនបើលោក ត្រាំ ត្រឡប់ទៅកាន់អំណាចវិញ លោក​អាច​នឹង​ស្វះស្វែងរកកិច្ចព្រមព្រៀងពាណិជ្ជកម្ម ឬសន្តិសុខមួយចំនួនរវាងប្រទេស ដែល​មាន​សេដ្ឋកិច្ចជឿនលឿនទាំងពីររបស់ពិភពលោកនេះ ដែលអាច​បំផ្លាញ​កិច្ច​ខិតខំ​ប្រឹងប្រែង​នា​ពេល​ថ្មី​ៗនេះ​ ដោយក្រុមប្រទេសទាំងប្រាំពីរ (G7) ដើម្បីប្រឆាំងនឹងប្រទេសចិន៕