មជ្ឈមណ្ឌលសកម្មភាពកំចាត់មីនកម្ពុជា ហៅកាត់ថា ស៊ីម៉ាក់ បានដាក់គោលដៅ ប្រឹងប្រែងបោសសម្អាតមីនក្នុងខេត្តចំនួន៨ ដែលក្នុងនោះរួមទាំងខេត្តជាប់បន្ទាត់ព្រំដែនផងនោះសម្រាប់ឆ្នាំ២០២៤ ឲ្យសម្រេចតាមផែនការរាជរដ្ឋាភិបាលកម្ពុជាអស់មីនក្នុងឆ្នាំ ២០២៥ ឲ្យទទួលបានជោគជ័យ។
ឯកឧត្តមនាយឧត្តម សេនីយ៍ ខឹម សោភ័ណ ប្រធានក្រុមប្រឹក្សាភិបាលផ្ទេរសិទ្ធនៃមជ្ឈមណ្ឌលសកម្មភាពកំចាត់មីនកម្ពុជា ថ្លែងនៅក្នុងកិច្ចប្រជុំសាមញ្ញក្រុមប្រឹក្សាភិបាលនៃមជ្ឈមណ្ឌលសកម្មភាពកំចាត់មីនកម្ពុជាកាលពីរសៀលថ្ងៃទី១ ខែកុម្ភៈ ឆ្នាំ២០២៤នេះថា ខេត្តដែលនៅមានមីន និងគ្រាប់មិនទាន់ផ្ទុះដែលប្រឈមគ្រោះថ្នាក់នៅឡើយនោះ មានដូចជាខេត្តពោធិ៍សាត់ ខេត្តបាត់ដំបង ខេត្តប៉ៃលិន ខេត្តបន្ទាយមានជ័យ ខេត្តឧត្តរមានជ័យ និងខេត្តព្រះវិហារ ជាដើម។ ប៉ុន្តែខេត្តដែលនៅសល់មីនច្រើនជាងគេដែលត្រូវខិតខំ និងពន្លឿនធ្វើការដោះ និងកម្ទេចឲ្យអស់ គឺខេត្តពោធិ៍សាត់ បាត់ដំបង និងបន្ទាយមានជ័យ។
ឯកឧត្តម ហេង រតនា ប្រតិភូរាជរដ្ឋាភិបាលកម្ពុជាទទួលបន្ឌុកជាអគ្គនាយកស៊ីម៉ាក់បញ្ជាក់ថា សម្រាប់ឆ្នាំ២០២៤នេះ អង្គភាពស៊ីម៉ាក់ មានផែនការបោសសម្អាតផ្ទៃដីចម្ការមីន/គ្រាប់ប្រមាណជាង ២៧៤គីឡូម៉ែត្រក្រឡា ក្នុងនោះផ្ទៃដីចម្ការមីនចំនួន ១៩៩ គីឡូម៉ែត្រក្រឡា និងផ្ទៃដីចម្ការគ្រាប់ចំនួន ៧៥គីឡូម៉ែត្រក្រឡា ព្រមទាំងផ្ដល់ការអប់រំយល់ដឹងពីមីនដល់ប្រជាពលរដ្ឋមូលដ្ឋានប្រមាណចន្លោះពី ១,៨ លាននាក់ទៅ ២ លាននាក់ និងរៀបចំផែនការស្រាវ ជ្រាវព័ត៌មានចម្ការមីន/គ្រាប់ផងដែរ។
ឯកឧត្តមបានឲ្យដឹងផងដែរថា កាលពីក្នុងឆ្នាំ២០២៣ កន្លងទៅនេះស៊ីម៉ាក់បាន រំដោះផ្ទៃដីចម្ការមីន/គ្រាប់បានចំនួន ២.៦០២ ទីតាំង មានផ្ទៃដីសរុបចំនួន ជាង ២៨១ លានម៉ែត្រក្រឡា។ កិច្ចប្រតិបត្តិការនេះបានរុករកឃើញ និងកម្ទេចចោលគ្រាប់មីន និងយុទ្ធភណ្ឌមិនទាន់ផ្ទុះគ្រប់ប្រភេទសរុបចំនួន ៨៣ ៨១៤ គ្រាប់ មានប្រជាពលរដ្ឋទទួលផលដោយផ្ទាល់ និងដោយប្រយោលមានចំនួន ៥៤៥ ៣៧៨ គ្រួសារ។
ឆ្នាំ២០២៣ កន្លងទៅនេះ ស៊ីម៉ាក់ក៏បានចុះធ្វើការផ្សព្វផ្សាយអប់រំការយល់ដឹងពីមីន/គ្រាប់ដល់ក្រុមគោលដៅបានចំនួន ១៨ ៣៤៩ លើក ស្មើនឹង ៨៧៩ ០៤៤ ខ្នងផ្ទះ មានប្រជាពលរដ្ឋចូលរួមសរុបចំនួន ១,៣លាននាក់ផងដែរ៕ អត្ថបទ៖ ភារម្យ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
