ពលរដ្ឋអាហ្សង់ទីន បាននាំគ្នាសម្រុកទៅកាន់ប្រភពទឹកផ្កាឈូកសាធារណៈនៅក្នុងទីក្រុង Buenos Aires កាលពីថ្ងៃព្រហស្បតិ៍ ដើម្បីធ្វើឲ្យត្រជាក់ខ្លួន ខណៈរលកកម្តៅមិនឈប់ឈរ បាន​វាយ​បក់មកលើប្រទេសនេះ។

ដោយមាន​សីតុណ្ហភាពឡើងដល់ ៣៦ អង្សាសេ ពលរដ្ឋក្នុងតំបន់ បានស្វែង​រក​ការ​សម្រាក​ពី​កម្តៅ​ខ្លាំង ហើយប្រភពទឹកផ្កាឈូកសហគមន៍ បានក្លាយជាទីតាំងសម្រាកដ៏ប្រសើរ។

ការិយាល័យ​សេវាឧតុនិយមជាតិប្រទេសអាហ្សង់ទីន នៅសប្តាហ៍នេះ បានចេញការព្រមាន​អំពី​អាកាស​ធាតុ​សម្រាប់​កម្តៅខ្លាំងក្នុងតំបន់ភាគច្រើន នៅក្នុងប្រទេសនេះ។

នៅក្នុងទីក្រុង Buenos Aires និងតំបន់ជុំវិញនេះ សីតុណ្ហភាពអតិបរិមា ត្រូវបានគេរំពឹង​ថានឹង​កើន​ឡើងដល់ ៣៨ អង្សាសេ ក្នុងរយៈពេលប៉ុន្មានថ្ងៃខាងមុខនេះ។