សារព័ត៌មានក្នុងស្រុកបានរាយការណ៍នៅថ្ងៃសុក្រនេះ ដោយដកស្រង់សម្តីរបស់នគរបាលថា អគ្គិភ័យ​ដែលបណ្តាលមកពីការផ្ទុះឧស្ម័ន នៅរដ្ឋធានី ណៃរ៉ូប៊ី (Nairobi) ប្រទេសកេនយ៉ា បណ្តាល​ឲ្យ​មនុស្ស ២ នាក់ស្លាប់ និងយ៉ាងហោចណាស់ ១៦៥ នាក់ រងរបួស។

អ្នកនាំពាក្យ​រដ្ឋាភិបាល លោក អ៊ីសាក់ វ៉ៅរ៉ា (Isaac Mwaura) បាននិយាយ​នៅលើ​វេទិកា​ប្រព័ន្ធ​ផ្សព្វ​ផ្សាយ​សង្គម X ថា អគ្គិភ័យនៅក្នុងសង្កាត់ អ៊ីមបាកាស៊ី(Embakasi) ទីក្រុង​ណៃរ៉ូប៊ី​(Nairobi) បានចាប់ផ្តើមនៅមុនពេលពាក់កណ្តាលអធ្រាត្រ នៅក្រុមហ៊ុនចាក់បំពេញឧស្ម័ន ដែល​អគាររបស់ក្រុមហ៊ុនត្រូវបានឆេះបំផ្លាញធ្ងន់ធ្ងរ។

រូបភាពពី​សារព័ត៌មាន Reuters ពីកន្លែងកើតហេតុនៃអគ្គិភ័យ បានបង្ហាញ​ពី​ក្រុម​អ្នក​ពន្លត់​អគ្គិភ័យ កំពុងប្រយុទ្ធដើម្បីពន្លត់អណ្តាតភ្លើង ខណៈមាន​សាកសព​មនុស្ស​ម្នាក់​គ្រប​ដោយ​ភួយ​ដេក​នៅ​លើដី​ក្បែរនោះ។ មន្ត្រី ក្នុងតំបន់បាននិយាយថា ជនរងគ្រោះច្រើន​នាក់​ត្រូវ​បាន​គេ​ជម្លៀស​ចេញ​។

លោក បូនីហ្វេស ស៊ីហ្វ៊ូណា(Boniface Sifuna) បានរងរបួសរលាកស្មារបស់លោក បន្ទាប់​ពី​ធុង​ឧស្ម័ន​បាន​ផ្ទុះ ខណៈលោកកំពុងព្យាយាមរត់គេចខ្លួន។ ផលប៉ះពាល់បានធ្វើឱ្យលោកដួល ហើយ​អណ្តាត​ភ្លើង​បានហ៊ុមព័ទ្ធលោក ប៉ុន្តែលោកនិយាយថា លោកមានសំណាង ដែលលោករឹងមាំ​គ្រប់​គ្រាន់​ ដើម្បីគេចខ្លួនចេញ៕