​បាល់ទាត់៖ ​ខ្សែការពារ​បារាំង Raphael Varane បាន​កំពុង​ស្ថិតក្នុង​ផ្លូវ​ចាក​ចេញពី​ក្លិប​អេ​ស្ប៉ា​ញ Real Madrid ច្រើន​ខែ​មកហើយ​ស្រប​ពេលដែល Euro ២០២០ ក្រុម​បារាំង​ចប់​បេសកកម្ម​ទៅទៀត​នោះ កិច្ចព្រមព្រៀង​ចាកចេញ​ទំនងជា​ចេញ​ជារូបរាង​។

​​បើតាម​ការចុះផ្សាយ​រប​ស់​ទូរទស្សន៍​អេ​ស្ប៉ា​ញ El Chiringuito បានអោយដឹងថា Manchester United និង Real Madrid បាន​ឈានដល់​កិច្ចព្រមព្រៀង​នឹង​គ្នា​ហើយ​ ក្នុងការ​ផ្ទេរ​កីឡាករ​វ័យ ២៧ឆ្នាំ​រូបនេះ​។ ​​សារព័ត៌មាន The Mirror ក៏បាន​រាយការណ៍​ផងដែរ​ថា ​ក្រុម​អធិរាជ​ស Real Madrid បើកចំហ​ចំពោះ​លទ្ធភាព​ក្នុង​ការលក់ Raphael Varane ទៅឲ្យ​ក្រុម​បិសាច​ក្រហម Manchester United នៅ​រដូវក្តៅ​នេះ ​ចំពេល​ដែល​កីឡាករ​បារាំង​រូបនេះ​មានការ​ស្ទាក់ស្ទើរ​ក្នុង​ការចុះ​កុងត្រា​ថ្មី​។​ កីឡាករ​វ័យ ២៧ឆ្នាំ​រូបនេះ​បាន​នៅ​ជាមួយ Los Blancos ចាប់តាំងពី​ឆ្នាំ ២០១១ និង​បាន​បង្ហាញខ្លួន​ចំនួន ៣៥១លើក​សម្រាប់​ក្លិប​គ្រប់​ក្របខណ្ឌ​។

​​Raphael Varane នឹង​ដល់​ឆ្នាំ​ចុងក្រោយ​នៃ​កិច្ចសន្យា​របស់ខ្លួន​ នៅ​ខែមិថុនា​ឆ្នាំក្រោយ​ហើយ​មិនមាន​ការចង្អុលបង្ហាញ​ណាមួយ​ដែលថា ​គេ​សុខចិត្ត​បន្ត​ការ​ស្នាក់នៅ​ជាមួយ​ក្លឹប​នោះទេ​។ ​​ដូច្នេះ Real Madrid ចង់​ រឹ​មិន​ចង់​នឹង​អាច​លក់​ខ្សែការពារ​សញ្ជាតិ​បារាំង​នេះ ​ចេញ​នៅ​រដូវក្តៅ​ខាងមុខ ប្រសើរ​ជាងការចាកចេញ​ដោយ​មិន​ទទួលបាន​អ្វី​សោះ​។ Manchester United មាន​ចំណាប់អារម្មណ៍​លើ​ខ្សែការពារ​កណ្តាល​រូបនេះ តាំងពី​ពេលដែល Varane នៅ Lens ជិត​មួយ​ទសវត្សរ៍​មុន​ហើយ​ក្លិប​នៅ Old Trafford មួយ​នេះ​ក៏​ព្យាយាម​ម្តងទៀត​នៅ​ឆ្នាំ២០១៩ ចែចូវ​កីឡាករ​វ័យ ២៧ឆ្នាំ​រូបនេះ​ពី Real Madrid៕

​អត្ថបទ​៖​នាង សុភា​វុ​ធ