ប្រព័ន្ធផ្សព្វផ្សាយរដ្ឋបាននិយាយនៅថ្ងៃសុក្រទី២ខែកុម្ភៈសប្ដាហ៍នេះថា មេដឹកនាំ​កូរ៉េខាង​ជើង​លោក Kim Jong Un បានរំលឹកជាថ្មី​ចំពោះ​ការ​យក​ចិត្ត​ទុក​ដាក់​របស់​លោក​លើ​ការ​ពង្រឹង​កង​កម្លាំង​ទ័ព​ជើង​ទឹករបស់លោក ខណៈលោកបាន​ត្រួត​ពិនិត្យ​ការ​សាងសង់​នាវា​ចម្បាំងថ្មី​នៅ​ទីតាំង​ផលិត​នាវានៅភាគខាងកើត ដោយហៅគម្រោងនេះថា​មាន​សារៈ​សំខា​ន់​ចំពោះ​ការ​រៀបចំ​សង្រ្គាម​របស់​ប្រទេស។  

ការត្រួតពិនិត្យរបស់លោកក្នុងទីតាំងផលិតកនាវានៅទីក្រុង ណាមផូ(Nampho) បានកើត​ឡើង​ក្រោយ​ការ​សំញែង​សាច់ដុំអាវុធជាបន្តបន្ទាប់កាលពីខែមករាថ្មីៗនេះ ដែលបង្កើនភាព​តាន​តឹង​ជាមួយ​គូ​ប្រជែង រួមទាំងការសាកល្បងមីស៊ីល តម្រង់គោលដៅ​ប្រភេទ​ថ្មី​ត្រូវ​បាន​ផលិត​ឡើង​ដើម្បី​បាញ់​ចេញ​ពី​នាវាមុជទឹក។  

ក្នុងរយៈពេលប៉ុន្មានខែថ្មីៗនេះ លោក Kim បាននឹងកំពុង​សង្កត់ធ្ងន់​លើ​គោល​ដៅ​របស់​លោក​ក្នុង​ការ​ពង្រឹង​ផ្នែកកងទ័ពជើងទឹកដែលមានអាវុធនុយក្លេអ៊ែរ ដើម្បីប្រឆាំង​នឹង​អ្វី​ដែល​លោក​បាន​បង្ហាញ​ពី​ការគំរាមកំហែងពីខាងក្រៅបង្កឡើងដោយសហរដ្ឋអាមេរិក កូរ៉េខាងត្បូង និងជប៉ុន ដែល​បានបង្កើនកិច្ចសហប្រតិបត្តិការយោធារបស់ពួកគេ ដើម្បីទប់ទល់នឹងអាវុធនុយក្លេអ៊ែរ និង​កម្មវិ​ធីមីស៊ីលរបស់លោក Kim ។

ទីភ្នាក់​ងារព័ត៌មានកណ្តាលកូរ៉េខាងជើងផ្លូវការ KCNA ពុំបានបញ្ជាក់​ថា​តើ​មេ​ដឹកនាំ​វ័យ​ក្មេង​រូប​នេះ ទៅកាន់ទីក្រុងណាមផូនៅពេលណានោះដោយគ្រាន់ថាលើកឡើងថា លោក Kim បាន​និយាយ​ថា ការពង្រឹង​កម្លាំង​ទ័ពជើង​ទឹក​របស់​លោក​បង្ហាញ​ខ្លួន​ឯង​ថា​ជា​បញ្ហា​សំខាន់​បំផុត​ក្នុង​ការ​ការពារ​អធិបតេយ្យភាពដែនសមុទ្ររបស់ប្រទេសប្រកបដោយភាពជឿជាក់ និង​ការ​បង្កើន​ការ​ត្រៀម​ខ្លួន​សម្រាប់សង្រ្គាម។

លោក Kim ក៏បានអំពាវនាវឱ្យបង្កើនអំណាចកម្លាំងទ័ពជើងទឹកផងដែរ កាលពីថ្ងៃអាទិត្យ ខ​ណៈ​លោក​កំពុង​ពិនិត្យ​មើល​ការ​សាកល្បង​មីស៊ីល​តម្រង់​គោលដៅ​ប្រភេទ​ថ្មី​មាន​សមត្ថភាព​បំពាក់​អាវុធ​នុយ​ក្លេអ៊ែរប្រភេទ Pulhwasal-3-31 ដែលត្រូវបាន​ផលិត​ឡើង​ដើម្បី​បាញ់​ចេញ​ពី​នាវា​មុជ​ទឹក​៕