កងនាវាចម្បាំងអាមេរិក និងជប៉ុនរាប់សិបគ្រឿង រួមទាំងនាវាផ្ទុកយន្តហោះអាមេរិកពីរគ្រឿង ត្រូវ​បាន​ដាក់​សំញែងកម្លាំងយោធានៅសប្តាហ៍នេះ នៅសមុទ្រហ្វីលីពីន ភាគខាងកើតកោះតៃវ៉ាន់។  

ក្រុមអ្នកវិភាគនិយាយថា សមយុទ្ធរួមគ្នាបង្ហាញថា កងទ័ពជើងទឹក​អាមេរិក​អាច​ឆ្លើយ​តប​ទៅ​នឹង​ឧបទ្ទវហេតុ​នានា​នៅទូទាំងដែនទឹកអាស៊ី ជាចំណុចដែលភាពតាន​តឹង​ជាមួយ​ចិន​នៅ​តែ​មា​ន​កម្រិត​ខ្ពស់ ស្របពេលកំពុងប្រឈមនឹងអរិភាពជាបន្តបន្ទាប់នៅមជ្ឈិមបូព៌ា។   

នាវាផ្ទុកយន្តហោះរបស់កងទ័ពជើងទឹកអាមេរិក USS Carl Vinson និង USS Theodore Roosevelt ត្រូវបានចូលរួមដោយឧទ្ធម្ភាគចក្រពិឃាដរបស់កង​កម្លាំង​ការពារ​ស្វ័យ​ការពារ​ដែន​សមុទ្រជប៉ុន JS Ise នាវាពិឃាដបំពាក់មីស៊ីលប្រើប្រព័ន្ធធុរបញ្ជា ដឹកនាំរបស់អាមេរិកចំនួន ៧ គ្រឿង និងនាវាចម្បាំង អាមេរិកចំនួន ២ គ្រឿងសម្រាប់អ្វីដែលកងទ័ពជើងទឹកហៅថា Multi-Large Deck Event (MLDE)។

ឧត្តមនាវី​ទោ លោក ខាឡូស សាឌីឡូ (Carlos Sardiello)មេបញ្ជាការក្រុមនាវា​វាយ​ប្រហារ​ផ្ទុក​យន្ត​ហោះចម្បាំង Carrier Strike Group 1 ដឹកនាំដោយនាវាផ្ទុកយន្តហោះ Vinson បាន​និយាយ​នៅក្នុងសេចក្តីថ្លែងការណ៍មួយថា សហរដ្ឋអាមេរិក និងជប៉ុន​មាន​សមត្ថភាព​ពិសេស​ក្នុង​ការ​ប្រមូល​ផ្តុំកងកម្លាំងទ័ពជើងទឹកដែលមាននាវាធំៗជាច្រើនយ៉ាងឆាប់រហ័ស ដើម្បីជួយ​ដល់​ផល​ប្រយោជន៍​សន្តិសុខទៅវិញទៅមកនៅឥណ្ឌូប៉ាស៊ីហ្វិក។   

សេចក្តីថ្លែងការណ៍របស់កងទ័ពជើងទឹកអាមេរិកបាននិយាយថា នាវាចម្បាំងរាប់សិបគ្រឿង​បាន​ធ្វើសមយុទ្ធការពារ ការឃ្លាំមើលដែនសមុទ្រ សមយុទ្ធកងទ័ពជើងទឹក និងសមយុទ្ធយុទ្ធសាស្ត្រ ដើម្បី​ជំរុញសមត្ថភាពប្រយុទ្ធកម្រិតខ្ពស់តែមួយគត់។

យោង​តាមសេចក្តីថ្លែងការណ៍របស់យោធាជប៉ុន សមយុទ្ធនេះបានចាប់ផ្តើមកាលពីថ្ងៃចន្ទ ហើយ​បាន​បញ្ចប់កាលពីថ្ងៃព្រហស្បតិ៍សប្ដាហ៍នេះ៕