រដ្ឋមន្ត្រីការពារជាតិអ៊ីស្រាអែលបាននិយាយកាលពីថ្ងៃព្រហស្បតិ៍ថា កងកម្លាំងថ្មើរជើង​បាន​បណ្តេញ​ក្រុម​ហាម៉ាសជាផ្លូវការចេញពីតំបន់ខាន់យូនីស(Khan Younis)នៃតំបន់ហ្កាហ្សា។

រដ្ឋមន្ត្រីការពារជាតិលោក យ៉ាវ ហ្គាឡិន (Yoav Gallant)បាននិយាយថា ជ័យជម្នះ​បាន​កើត​ឡើង​នៅ​ពេលដែលកងកម្លាំងការពារអ៊ីស្រាអែល​បានសម្លាប់យុទ្ធជន​ហាម៉ាស​ចំនួន ១០.០០០​នាក់ និង​១០.០០០នាក់ផ្សេងទៀតរងរបួស។

នៅព្រឹកថ្ងៃដដែល លោក Gallant បានប្រាប់កងទ័ពថ្មើរជើងថា សកម្មភាពរបស់ពួកគេក្នុងការនាំ ចំណាប់​ខ្មាំងត្រឡប់ទៅផ្ទះវិញកាន់តែខិតជិតហើយ ព្រោះក្រុមហាម៉ាសបរាជ័យហើយ។

សេចក្តី​ថ្លែង​ការណ៍របស់ លោក Gallant បានកើត​ឡើង​ប៉ុន្មាន​ថ្ងៃ​បន្ទាប់​ពី​ការ​ព្យាករណ៍​របស់​កង​កម្លាំង​ការពារ​អ៊ីស្រាអែល (IDF) បញ្ជាក់ថាការកាន់កាប់របស់ក្រុមហាម៉ាស លើតំបន់ Khan Younis នឹងត្រូវខ្ចាត់ខ្ចាយក្នុងរយៈពេលពីរទៅបីសប្តាហ៍។    

កងកម្លាំងការពារអ៊ិស្រាអែល ពុំទាន់បាន​ប្រកាស​ពី​ការ​គ្រប់គ្រង​ប្រតិបត្តិការ​ពេញ​លេញ​របស់​តំបន់ Khan Younis នៅឡើយទេ។ យោធាកាលពីប៉ុន្មានថ្ងៃមុនបាននិយាយថា ខ្លួន​កំពុង​ឈាន​ទៅ​ដល់​ការ​កម្ទេចចោលកងវរសេនាតូចហាម៉ាសចុងក្រោយនៅផ្នែកខាងលិចនៃទីក្រុងនេះ ប៉ុន្តែ​បាន​លើក​ឡើងថា​ដំណើរការនេះអាចស៊ីពេលច្រើនសប្តាហ៍ទៀត។  

សេចក្តីប្រកាស​របស់លោក Gallant នឹងណែនាំថា កងកម្លាំងការពារអ៊ីស្រាអែល បានកាត់​បន្ថយ​កម្លាំង​របស់​ហាម៉ាសពី ៥៦ ទៅ ៧៥% ដោយសន្មតថាកងកម្លាំងមុនសង្គ្រាមរបស់ក្រុមចលនាហាម៉ាស មានចន្លោះពី ៣ម៉ឺន ទៅ៤ម៉ឺននាក់។ 

កងកម្លាំងកា​រពារអ៊ីស្រាអែល បាននិយាយថា ខ្លួនទទួលបានជ័យជម្នះដ៏ធំនៅក្នុងតំបន់ Khan Younis ដោយកាត់​បន្ថយ​សមត្ថភាព​របស់​ក្រុម​ហាម៉ាស​ក្នុង​ប្រតិបត្តិការ​ប្រកប​ដោយ​ការ​ប្រុង​ប្រយ័ត្ន​នៅ​ក្នុងតំបន់៕