អ្នកសម្របសម្រួលក្រុមប្រឹក្សាសន្តិសុខជាតិសម្រាប់ទំនាក់ទំនងយុទ្ធសាស្ត្រ លោក ចន ឃើប៊ី (John Kirby) បាននិយាយក្នុងសន្និសីទសារព័ត៌មាននៅសេតវិមានកាលពីថ្ងៃទី៣១ ខែមករាថា ទីក្រុងវ៉ាស៊ីនតោន បានត្រៀមខ្លួនរួចជាស្រេចក្នុងការបន្តកម្មវិធីយន្តហោះចម្បាំង F-35 របស់​ទួរ​គី​ឡើង​វិញ ប្រសិនបើ ទីក្រុងអង់ការ៉ា យល់ព្រមឈប់ប្រើប្រាស់ប្រព័ន្ធមីស៊ីលការពារដែនអាកាស S-300 និង S-400របស់រុស្ស៊ី។

«ពុំមានការផ្លាស់ប្តូរចំពោះទស្សនៈរបស់យើងដែលថា កម្មវិធីយន្តហោះចម្បាំងF-35 សម្រាប់ទួរគី គឺ​មិនស៊ីគ្នានឹងការប្រើប្រាស់មីស៊ីលS-300 និង S-400 របស់ពួកគេនោះទេ។ ដូច្នេះ យើង​នៅ​តែ​មាន​ការ​ពិភាក្សាទាំងនោះ ហើយប្រសិនបើទួរគី អាចដោះស្រាយកង្វល់របស់យើងអំពីបញ្ហានោះ នោះ​អាច​នឹងមានការស្តារឡើងវិញនូវការផ្លាស់ប្តូរទៅក្នុងកម្មវិធីF-35»។

មុននេះ រដ្ឋបាលលោកបៃដិន បានប្រកាសថា ខ្លួនបានយល់ព្រមលើកិច្ចព្រមព្រៀងតម្លៃ ២៣​ពាន់​លាន​ដុល្លារ ដើម្បីលក់យន្តហោះចម្បាំង F-16 ទៅឲ្យប្រទេសទួរគី បន្ទាប់ពីទីក្រុងអង់ការ៉ា បា​ន​ផ្តល់​​សច្ចាប័នលើសមាជិកភាពរបស់អង្គការណាតូរបស់ប្រទេសស៊ុយអែត នេះបើ​យោង​តាម​ក្រសួង​ការ​បរទេស។

ក្រសួង​ការបរទេស នឹងជូនដំណឹងដល់សភាអំពីកិច្ចព្រមព្រៀងនេះ ក៏ដូចជាការលក់យន្តហោះ F-35 ចំនួន ៤០គ្រឿងទៅប្រទេសក្រិកដោយឡែកក្នុងតម្លៃ ៨,៦ពាន់លានដុល្លារ។ ទួរគី​នឹង​ទទួល​បាន​យន្តហោះ F-16 ថ្មីចំនួន ៤០គ្រឿង និងធ្វើឲ្យកើនឡើងដល់ ៧៩នៃយន្តហោះ​នៅ​ក្នុង​កង​នាវា​ដែល​មានស្រាប់របស់ខ្លួននោះ៕