មន្ត្រីអាមេរិកម្នាក់ និងប្រភពដែលដឹងពីបញ្ហានេះ បានប្រាប់សារព័ត៌មាន CNNថា លោក​ប្រធានា​ធិបតី ចូ បៃដិន (Joe Biden) បានចេញក្រឹត្យ​ប្រ​តិបត្តិ​មួយ​កំណត់​គោលដៅ​លើ​អ្នក​តាំង​លំ​នៅ​អ៊ីស្រាអែល​ដែល​បង្កអំពើហិង្សានៅតំបន់វេសបែង (West Bank) ដែលលោកបាននិយាយថា បានធ្វើឲ្យ ខូចស្ថិរភាព នៅក្នុងតំបន់នេះ។

សេចក្តីណែនាំថ្មីដែលត្រូវបានរាយការណ៍ជាលើកដំបូងដោយសារព័ត៌មាន Politico ហើយរំពឹងថា នឹង​ប្រកាសកាលពីថ្ងៃព្រហស្បតិ៍ នឹងដាក់ទណ្ឌកម្មលើបុគ្គលមួយចំនួន ដែល​ត្រូវ​បាន​ចោទ​ប្រកាន់​​ថា បានចូលរួមក្នុងអំពើហិង្សាទាំងនោះ។

មន្ត្រី​រដ្ឋបាល​​ជាន់ខ្ពស់មួយរូប បាននិយាយថា ក្រឹត្យប្រតិបត្តិនេះ កំណត់គោល​ដៅ​លើ​បុគ្គល​ចំនួន​៤​នាក់ ដែលត្រូវបានចោទប្រកាន់ពីបទប្រព្រឹត្តអំពើហិង្សា ឬការបំភិត​បំភ័យ​ដោយ​ផ្ទាល់​នៅ​ក្នុង​ទីក្រុង​វេសបែង រួមទាំងមនុស្សដែលត្រូវបានចោទប្រកាន់ពីញុះញង់ និងដឹកនាំកុបកម្មមួយ ដុត​អគារ វាលស្រែ និងយានយន្ត វាយដំជនស៊ីវិល និងបំផ្លាញទ្រព្យសម្បត្តិផ្សេងៗ។

ក្រសួងការបរទេស បានប្រកាស​ឈ្មោះជ​ន​ជាតិ​អ៊ីស្រាអែល​ដែល​ត្រូវ​បាន​កំណត់​គោលដៅ​ដោយ​បទ​បញ្ជា​ប្រតិបត្តិដែលរាំងខ្ទប់ទ្រព្យសម្បត្តិហិរញ្ញវត្ថុរបស់ពួកគេ និងរារាំងពួក​គេ​មិន​ឲ្យ​ចូល​មក​សហរដ្ឋ​អាមេរិក។ ពួកគេគឺមាន លោកដេវី ចៃ ចាសដៃ (David Chai Chasdai), លោក អេណាន តានជីល ( Einan Tanjil) , លោក សាឡុម ហ្ស៊ីជឺម៉ែន (Shalom Zicherman) និង លោក យីណុន លីវី (Yinon Levi)។

សេតវិមាន បានជូនដំណឹងដល់រដ្ឋាភិបាលអ៊ីស្រាអែលអំពីផែនការរបស់ពួកគេ មុន​ពេល​ចេញ​ក្រឹត្យ​នេះ។​

ក្រុមមន្ត្រី បាននិយាយថា ពួកគេបានប្រមូលចងក្រងភ័ស្តុតាងដែលពួកគេ បាននិយាយថា ផ្តល់​ភ័ស្តុតាង​នៃ​តួនាទីរបស់បុគ្គល នៅក្នុងអំពើហិង្សានៅតំបន់វេសបែង ដែលអាច​ទប់​ទល់​នឹង​ការ​ត្រួត​ពិនិត្យ​ផ្ទៀងផ្ទាត់របស់តុលាការ រួមទាំងព័ត៌មានពីការរាយការណ៍ជាសាធារណៈផងដែរ៕