កុមារីអាយុ ៥ឆ្នាំម្នាក់នៅប្រទេសម៉ាឡេស៊ី បានស្លាប់បាត់បង់ជីវិត បន្ទាប់ពីត្រូវបានគេប្រទះឃើញសន្លប់នៅក្នុងរថយន្តរបស់ម្តាយនាង កាលពីថ្ងៃអង្គារ (៣០ មករា)។ រថយន្តនោះបានចតនៅជិតទ្វារក្រោយមន្ទីរពេទ្យ ស្ហាស អាឡាម (Shah Alam)។ 

អធិការនគរបាលស្រុក ស្ហាស អាឡាម លោក អេស៊ីភី ម៉ូដ អ៊ីកបាល អ៊ីប្រាហ៊ីម (ACP Mohd Iqbal Ibrahim) បាននិយាយថា នគរបាលត្រូវបានជូនដំណឹងអំពីឧបទ្ទវហេតុនេះដោយបុគ្គលិកមន្ទីរពេទ្យនៅម៉ោងប្រហែល ៨យប់ថ្ងៃដដែលនោះ។

ក្រុមអាជ្ញាធរបានរកឃើញថា ម្តាយរបស់ក្មេងនោះធ្វើការនៅមន្ទីរពេទ្យ ហើយបានទុកក្មេងស្រីនោះចោលនៅក្នុងរថយន្តដោយចៃដន្យ។ នាងបានមកទទួលកូនស្រីនៅកន្លែងថែទាំក្បែរនោះនៅម៉ោងប្រហែល ២រសៀល ហើយត្រឡប់ទៅធ្វើការវិញ ។ 

លោកអធិការ ម៉ូដ អ៊ីកបាល បាននិយាយថា «ក្មេងស្រីរងគ្រោះបានដេកលក់នៅក្នុងរថយន្តដោយម៉ាស៊ីនបានបិទ។ ម្តាយវ័យ ៣៤ឆ្នាំរបស់កុមារនោះ បានដឹងអំពីឧប្បត្តិហេតុនៅពេលដែលប្តីរបស់នាងបានទាក់ទងទៅនាងនៅម៉ោង ៦ល្ងាច»។

អធិការនគរបាលរូបនោះបានបន្ថែមថា «ជនរងគ្រោះត្រូវបានបញ្ជូនទៅមន្ទីរពេទ្យ ស្ហាស អាឡាម ផ្នែកនាយកដ្ឋានសង្គ្រោះបន្ទាន់ក្នុងស្ថានភាពសន្លប់ ហើយត្រូវគេប្រកាសថាបានស្លាប់បន្ទាប់ពីការខិតខំប្រឹងប្រែងជួយសង្គ្រោះមិនបានជោគជ័យ ហើយក្រោយពីធ្វើកោសល្យវិច័យលើក្មេងនោះ បង្ហាញថាមិនមានរបួសខាងក្រៅ ឬខាងក្នុងនោះទេ»៕