ទីភ្នាក់ងារអង្គការសហប្រជាជាតិ ដែលផ្តល់ជំនួយមនុស្សធម៌ដល់ជនភៀសខ្លួនប៉ាឡេស្ទីន និយាយថា ទីភ្នាក់ងារនេះ ទំនងជានឹងត្រូវបង្ខំឱ្យបញ្ឈប់ប្រតិបត្តិការភាគច្រើនរបស់ខ្លួននៅចុងខែនេះ ប្រសិនបើការ ផ្តល់មូលនិធិនៅតែត្រូវបានផ្អាក។

ម្ចាស់ជំនួយធំៗ ដល់ទីភ្នាក់ងារជំនួយ និងការងារសម្រាប់ជនភៀសខ្លួនប៉ាឡេស្ទីនរបស់អង្គការសហប្រជាជាតិនៅតំបន់ជិតបូព៌ា ឬ UNRWA បានផ្អាកការផ្តល់មូលនិធិបន្ថែម បន្ទាប់ពីមានការចោទប្រកាន់ថា បុគ្គលិកមួយចំនួនរបស់ទីភ្នាក់ងារ បានជាប់ពាក់ព័ន្ធក្នុងការវាយប្រហាររបស់ក្រុមហាម៉ាសកាលពីថ្ងៃទី ៧ ខែតុលា នៅប្រទេសអ៊ីស្រាអែល។

ទីភ្នាក់ងារ បាននិយាយនៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ថា មូលនិធិចំនួន ៤៤០ លានដុល្លារ ត្រូវបានផ្អាក។ 

អគ្គស្នងការ លោក ហ្វីលីព ឡាហ្សារីនី (Philippe Lazzarini) បាននិយាយថា ទីភ្នាក់ងារ UNRWA នៅតែជាអង្គការផ្តល់ជំនួយធំបំផុត នៅក្នុងវិបត្តិមនុស្សធម៌ធ្ងន់ធ្ងរ និងស្មុគស្មាញបំផុត នៅក្នុងពិភពលោក។

លោក បានបង្ហាញពីអារម្មណ៍នៃវិបត្តិ ដោយនិយាយថា ការផ្អាកជំនួយផ្គត់ផ្គង់ផ្នែកហិរញ្ញវត្ថុ នឹងប៉ះពាល់ដល់សកម្មភាពរបស់ទីភ្នាក់ងារ មិនត្រឹមតែនៅក្នុងតំបន់ហ្កាហ្សាប៉ុណ្ណោះទេ ប៉ុន្តែថែមទាំង នៅទូទាំងមជ្ឈឹមបូព៌ា។