អុីស្រាអែល ៖ កងទ័ពប្រទេសអ៊ីស្រាអែល បានដោះលែងពលរដ្ឋប៉ាឡេស្ទីន ១១៤នាក់ កាលពីថ្ងៃព្រហស្បតិ៍ តាមរយៈច្រកព្រំដែន ឃឺរេម ស្សាឡំ(Kerem Shalom) ក្នុងតំបន់ហ្កាហ្សាភាគខាងត្បូង ជាអ្នកដែលត្រូវបានចាប់ខ្លួនក្នុងអំឡុងពេលប្រតិបត្តិការជើងគោក។

ប្រភពសន្តិសុខប៉ាឡេស្ទីន ពីអាជ្ញាធរព្រំដែនក្នុងតំបន់ហ្កាហ្សា បានប្រាប់សារព័ត៌មានស៊ីនហួថា ពលរដ្ឋប៉ាឡេស្ទីនមួយចំនួន ដែលត្រូវបានដោះលែង ត្រូវបានផ្ទេរទៅកាន់មន្ទីរពេទ្យ Najjar ក្នុងទីក្រុង Rafah ដោយសារតែស្ថានភាពសុខភាពរបស់ពួកគេកាន់តែយ៉ាប់យ៉ឺន។

យោងតាមអង្គការឃ្លាំមើលសិទ្ធិមនុស្សរបស់អឺរ៉ុប-ម៉េឌីទែរ៉ាណេ បានឲ្យដឹងថា ក្នុងអំឡុងពេលប្រតិបត្តិការជើងគោករបស់ខ្លួននៅតំបន់ហ្កាហ្សា កងទ័ពអ៊ីស្រាអែល បានចាប់ខ្លួនពលរដ្ឋប៉ាឡេស្ទីនរាប់រយនាក់ និងផ្ទេរពួកគេទៅកាន់កាន់ទីតាំងដែលពុំត្រូវបានដឹង។

អ្នកជាប់ឃុំមួយចំនួនដែលត្រូវបានជួបជាមួយសារព័ត៌មានស៊ីនហ៊ួរ ក្នុងអំឡុងពេលវត្តមានរបស់ពួកគេនៅក្នុងមន្ទីរពេទ្យ បាននិយាយថា ពួកគេត្រូវបាន វាយដំ ធ្វើឱ្យអាម៉ាស់មុខ និងត្រូវបានធ្វើទារុណកម្ម ក្នុងអំឡុងពេលឃុំខ្លួនរបស់ពួកគេ ជាការចោទប្រកាន់ ដែលពុំត្រូវបានផ្ទៀងផ្ទាត់។