ប្រភពចំនួនបី បាននិយាយថា អារ៉ាប៊ីសាអ៊ូឌីត នឹងសុខចិត្តទទួលយកការប្តេជ្ញាចិត្តផ្នែកនយោបាយពីអ៊ីស្រាអែល ដើម្បីបង្កើតរដ្ឋប៉ាឡេស្ទីន ជាជាងអ្វីដែលមានចំណងបន្ថែមទៀត ក្នុងគោលបំណង ដើម្បីទទួលបានកិច្ចព្រមព្រៀងការពារជាតិជាមួយទីក្រុងវ៉ាស៊ីនតោនដែលត្រូវបានអនុម័ត នៅមុនការបោះឆ្នោតប្រធានាធិបតីសហរដ្ឋអាមេរិក។

ការទូតជាច្រើនខែដែលដឹកនាំដោយសហរដ្ឋអាមេរិក ដើម្បីធ្វើឲ្យប្រទេសអារ៉ាប៊ីសាអ៊ូឌីត ធ្វើឲ្យមានប្រក្រតីភាពទំនាក់ទំនងជាមួយអ៊ីស្រាអែលឡើងវិញ និងទទួលស្គាល់ប្រទេសនេះ ជាលើកដំបូងត្រូវបានរារាំងដោយទីក្រុងរីយ៉ាដ នៅក្នុងខែតុលា ដោយសារអារ៉ាប់ផ្ទុះកំហឹងចំពោះសង្គ្រាម នៅតំបន់ហ្កាហ្សា។

ប្រភពក្នុងតំបន់ពីរ បានឲ្យដឹងថា អារ៉ាប៊ីសាអ៊ូឌីត មានបំណងកាន់តែខ្លាំងឡើងក្នុងការពង្រឹងសន្តិសុខរបស់ខ្លួន និងទប់ស្កាត់ការគំរាមកំហែងពីគូប្រជែងអ៊ីរ៉ង់ ដូច្នេះព្រះរាជាណាចក្រនេះ អាចបន្តទៅមុខជាមួយនឹងផែនការមហិច្ឆិតារបស់ខ្លួនក្នុងការផ្លាស់ប្តូរសេដ្ឋកិច្ចរបស់ខ្លួន និងទាក់ទាញការវិនិយោគបរទេសដ៏ធំ។

ប្រភពក្នុងតំបន់ដ៏សំខាន់ពីរ បានប្រាប់សារព័ត៌មានរ៉យទ័រថា ដើម្បីបង្កើតឱកាសខ្លះក្នុងការពិភាក្សាអំពីការទទួលស្គាល់អ៊ីស្រាអែល និងដើម្បីទទួលបានកិច្ចព្រមព្រៀងរបស់សហរដ្ឋអាមេរិកឡើងវិញ មន្ត្រីអារ៉ាប៊ីសាអ៊ូឌីត បានប្រាប់សមភាគីអាមេរិកថា ទីក្រុងរីយ៉ាដ នឹងមិនទទូចឲ្យអ៊ីស្រាអែល ចាត់វិធានការជាក់ស្តែង ដើម្បីបង្កើតរដ្ឋប៉ាឡេស្ទីនទេ ហើយជំនួសមកវិញ នឹងទទួលយកការប្តេជ្ញាចិត្តខាងនយោបាយ។