​អាមេរិក៖ ក្រុម​មន្ត្រី​បាន​និយាយ​កាលពី​ថ្ងៃ​អង្គា​រថា​ បទបញ្ជា​ឲ្យ​ពលរដ្ឋ​ជម្លៀស​ចេញពី​លំនៅឋាន​នៅតែ​បន្ត សម្រាប់​ផ្នែក​ជាច្រើន​ក្នុង​តំបន់ Siskiyou ខណៈ​ដែល​ភ្លើង​ឆេះ​ព្រៃ Lava បន្ត​ឆេះ​រាលដាល​ខ្លាំង។​

​យោង​តាម​ទីភ្នាក់ងារ​អភិរក្ស​ព្រៃឈើ​សហរដ្ឋអាមេរិក ភ្លើង​ឆេះ​ព្រៃ​នេះ​កំពុង​ឆេះ​រាលដាល​លើ​ផ្ទៃដី​ប្រមាណ ៤,៥​ម៉ា​ល៍ភាគ​អាគ្នេយ៍​នៃ​បឹង Shastina និង​មាន​ចម្ងាយ​ ៣.៥​ម៉ា​ល៍​ភាគ​ខាង​ពាយ័ព្យ​សហគមន៍ Weed​។ នោះ​គឺជា​ភ្លើង​ឆេះ​ព្រៃ​មួយ​ក្នុងចំណោម​ភ្លើង​ឆេះ​ព្រៃ​មួយ​ចំនួន ​ដែល​បាន​ឆាបឆេះ​កាលពី​ថ្ងៃ​សុក្របន្ទាប់ពី​រន្ទះបាញ់​ជា​បន្តបន្ទាប់​។​ ​ការិយាល័យ​តំបន់ Siskiyou បាន​ឲ្យ​ដឹង​ថា បទបញ្ជា​ជម្លៀស​ពលរដ្ឋ​ត្រូវ​បាន​ចេញ ​សម្រាប់​ផ្នែក​មួយ​ចំនួន​នៅ​តំបន់​បឹង Shastina និង​តំបន់​ជ្រលង​ភ្នំ Juniper ក្បែរ​វិថី Big Springs ចេញពី​ផ្លូវ Highway 97 រហូតដល់​តំបន់ McDonald Lane​។ ទីភ្នាក់ងារ​អភិរក្ស​ព្រៃឈើ​ខាងលើ ​ចំហេះ​ព្រៃ​នេះ​បាន​ឆេះ​បំផ្លាញ​ព្រៃឈើ​ជាង ៥​ពាន់​ហិច​តា និង​ពន្លត់​បាន ​២០% គិត​ត្រឹម​ម៉ោង​ ១:៤០​នាទី​ល្ងាច៕

អត្ថបទ៖ សុខមាន