គណៈកម្មាធិការលើកលែងទោសរបស់ប្រទេសម៉ាឡេស៊ី បានប្រកាសថា ការកាត់ទោសឲ្យជាប់ពន្ធនាគាររបស់អតីតនាយករដ្ឋមន្ត្រី លោក Najib Razak ពីបទពុករលួយ ត្រូវបានកាត់បន្ថយទោសពី ១២ ឆ្នាំមកត្រឹម ៦ ឆ្នាំ។ ការប្រកាសជាផ្លូវការ នៅថ្ងៃសុក្រ ទី២ ខែកុម្ភះនេះ ធ្វើឡើងបន្ទាប់ពីគណៈកម្មាធិការលើកលែងទោស បានជួបប្រជុំគ្នាកាលពីថ្ងៃទី ២៩ ខែមករា។

សារព័ត៌មាន CNA បានរាយការណ៍កាលពីថ្ងៃទី ៣១ ខែមករា ដោយដកស្រង់ប្រភពនានារួមទាំងមន្ត្រីរដ្ឋាភិបាលជាន់ខ្ពស់ថា លោក Najib នឹងត្រូវកាត់បន្ថយទោសជាប់ពន្ធនាគារពាក់កណ្តាល និងការពិន័យក្រោមការលើកលែងទោសពីព្រះមហាក្សត្រ។ លោក Najib អាយុ ៧០ ឆ្នាំ បានជាប់ពន្ធនាគារតិចជាង២ ឆ្នាំ សម្រាប់តួនាទីរបស់លោកនៅក្នុងសំណុំរឿងក្រុមហ៊ុន 1MDB ។

សេចក្តីថ្លែងការណ៍បាននិយាយថា ដោយមានការកាត់បន្ថយទោសជាប់ពន្ធនាគារ លោក Najib បាន ព្រមព្រៀងថា លោកនឹងត្រូវបានដោះលែងនៅថ្ងៃទី ២៣ ខែសីហា ឆ្នាំ ២០២៨ ។ គណៈកម្មាធិការលើកលែងទោស ក៏បានកាត់បន្ថយការពិន័យជាប្រាក់របស់លោកចំនួន២១០លានរីងគិតម៉ាឡេស៊ី ឬ (៤៤,៥ លានដុល្លារ) មកត្រឹម ៥០ លាន រីងគិតម៉ាឡេស៊ី ។

កិច្ចប្រជុំដែលបានធ្វើឡើង គឺជាព្រះរាជកិច្ចផ្លូវការចុងក្រោយមួយរបស់មហាក្សត្រស៊ុលតង់ អាប់ឌុលឡា រីយ៉ាទូឌីន (Sultan Abdullah Ri'ayatuddin) មុនពេលដែលទ្រង់ បានលាចេញពីតំណែងជាមហាក្សត្រម៉ាឡេស៊ីនៅថ្ងៃទី ៣១ ខែមករា ហើយបានប្រគល់ព្រះរាជកិច្ចទៅឱ្យអ្នកគ្រប់គ្រងរដ្ឋ Johor មហាក្សត្រ ស៊ុលតង់ អាប់ប្រាហ៊ីម ស៊ុលតង់ អ៊ីសកាន់ដា (Sultan Ibrahim Sultan Iskandar) ក្រោមប្រព័ន្ធវិលជុំ តែមួយគត់របស់ប្រទេស សម្រាប់គ្រួសាររាជវង្សទាំងប្រាំបួន។