ប្រធានាធិបតីសហរដ្ឋអាមេរិកលោក Joe Biden ទទួលបានការសន្យាយ៉ាងមុតមាំនៃការគាំទ្រពីសហជីពកម្មករ កាលពីថ្ងៃព្រហស្បតិ៍ (ទី១ ខែកុម្ភៈ) ដែលមានសារៈសំខាន់ ចំពោះការប្រឹងប្រែង ដើម្បីជាប់ឆ្នោតឡើងវិញរបស់លោក នៅក្នុងរដ្ឋ Michigan។

លោក Biden បានធ្វើដំណើរទៅកាន់រដ្ឋដែលជាសមរភូមិបោះឆ្នោត ដើម្បីទៅទស្សនាសាលសហជីព United Auto Workers (UAW) ក្នុងទីក្រុង Warren ជាកន្លែងដែលសមាជិកគ្រោងនឹងធ្វើការលើខ្សែទូរស័ព្ទតំណាងឲ្យរូបលោក ដើម្បីប្រមូលទិន្នន័យអ្នកបោះឆ្នោត មុនពេលការប្រកួតប្រជែងជ្រើសរើសបេក្ខជនរបស់រដ្ឋ នៅថ្ងៃទី២៧ ខែកុម្ភៈ។

លោកត្រូវបានស្វាគមន៍ដោយប្រធានរបស់ UAW គឺលោក Shawn Fain ដែលកាលពីសប្តាហ៍មុន បានផ្តល់ការគាំទ្រយ៉ាងពេញទំហឹង ចំពោះអ្នកកាន់តំណែងខាងគណបក្សប្រជាធិបតេយ្យរូបនេះ ហើយស្តីបន្ទោសយ៉ាងខ្លាំងក្លាចំពោះបេក្ខជនរបស់គណបក្សសាធារណរដ្ឋលោក Donald Trump។

លោក Biden បានប្រាប់អ្នកចូលរួមថា វណ្ណៈកណ្តាលបានកសាងប្រទេស ហើយបានសង្កត់ធ្ងន់ថា នៅពេល «កម្លាំងពលកម្មធ្វើបានល្អ អ្នករាល់គ្នាធ្វើបានល្អ»។ ក្រោយមកលោកបាននិយាយក្នុងន័យលេងសើចថា៖ «ក្រៅពីនេះ អ្នកបានផលិត «រថយន្តម៉ាក 67 Corvette របស់ខ្ញុំ»៕