ក្រុមប្រឹក្សាលើកលែងទោសរបស់ប្រទេសម៉ាឡេស៊ី បានប្រកាសថា ទោសជាប់ពន្ធនាគាររបស់អតីតនាយករដ្ឋមន្ត្រី លោក Najib Razak ពីបទពុករលួយ ត្រូវបានកាត់បន្ថយពី ១២ឆ្នាំមកត្រឹម ៦ឆ្នាំ ដោយការប្រកាសនេះ ត្រូវបានធ្វើជាផ្លូវការ នៅថ្ងៃសុក្រ (ទី២ ខែកុម្ភៈ) បន្ទាប់ពីក្រុមប្រឹក្សាលើកលែងទោស បានជួបប្រជុំគ្នា កាលពីថ្ងៃទី២៩ ខែមករា។

ប្រព័ន្ធផ្សព្វផ្សាយ CNA គឺជាបណ្ដាញសារព័ត៌មានដំបូងគេ ដែលទម្លាយព័ត៌មាន នៅថ្ងៃទី៣១ ខែមករា ដោយដកស្រង់ប្រភពជាច្រើន ក្នុងនោះរួមទាំងមន្ត្រីរដ្ឋាភិបាលជាន់ខ្ពស់ផង ដែលថា លោក Najib នឹងត្រូវបានកាត់បន្ថយរយៈពេលជាប់ពន្ធនាគារ និងពិន័យជាប្រាក់ពាក់កណ្ដាល ក្រោមការប្រទានលើកលែងទោសពីព្រះមហាក្សត្រ។

លោក Najib វ័យ ៧០ឆ្នាំ បានអនុវត្តទោសជាប់ពន្ធនាគារតិចជាង ២ឆ្នាំ សម្រាប់តួនាទីរបស់លោក នៅក្នុងសំណុំរឿងរបស់ក្រុមហ៊ុនអភិវឌ្ឍយុទ្ធសាស្ត្រម៉ាឡេស៊ី 1Malaysia Development Berhad (1MDB)។ សេចក្តីថ្លែងការណ៍បានឲ្យដឹងថា ជាមួយនឹងការកាត់បន្ថយរយៈពេលជាប់ពន្ធនាគារ លោក Najib បានយល់ព្រមថា រូបលោកនឹងត្រូវបានដោះលែង នៅថ្ងៃទី២៣ ខែសីហា ឆ្នាំ២០២៨។

ក្រុមប្រឹក្សាលើកលែងទោសក៏បានកាត់បន្ថយការផាកពិន័យរបស់លោកចំនួន ២១០លានរ៉ីងហ្គីត (៤៤,៥លានដុល្លារ) មកត្រឹម ៥០លានរ៉ីងហ្គីតវិញ។ តែប្រសិនបើការផាកពិន័យមិនត្រូវបានបង់ទេនោះ រយៈពេល ១ឆ្នាំ នឹងត្រូវបញ្ចូលទៅក្នុងទោសជាប់ពន្ធនាគាររបស់លោក Najib ហើយលោកនឹងទទួលបានសេរីភាព នៅថ្ងៃទី២៣ ខែសីហា ឆ្នាំ២០២៩៕