សកម្មជនអាកាសធាតុស៊ុយអែត នាង Greta Thunberg នៅថ្ងៃសុក្រ (ទី២ ខែកុម្ភៈ) បានទៅដល់តុលាការ Westminster Magistrates ក្នុងទីក្រុងឡុងដ្រ៍ហើយ ដែលជាថ្ងៃទី២ ជាកន្លែងដែលនាង និងសកម្មជនបរិស្ថាន ៤នាក់ផ្សេងទៀត កំពុងត្រូវបានកាត់ទោសពីបទបំពានសណ្តាប់ធ្នាប់សាធារណៈ អំឡុងការតវ៉ា នៅខាងក្រៅសន្និសីទប្រេង និងឧស្ម័ន កាលពីខែតុលាឆ្នាំមុន។

នាង Thunberg ដែលបានក្លាយជាអ្នកធ្វើយុទ្ធនាការដ៏លេចធ្លោ នៅទូទាំងពិភពលោក បន្ទាប់ពីធ្វើបាតុកម្មប្រចាំសប្តាហ៍ នៅមុខរដ្ឋសភាស៊ុយអែត ក្នុងឆ្នាំ២០១៨ បានឈរឲ្យថតរូបនៅខាងក្រៅតុលាការ ដោយកាន់បដាសរសេរថា «ការតវ៉ាអាកាសធាតុមិនមែនជាអំពើឧក្រិដ្ឋកម្មទេ»។

ជនជាប់ចោទទាំង ៥នាក់ដែលមានអាយុចន្លោះពី ១៩ឆ្នាំ ទៅ ៥៩ឆ្នាំ និងដែលបានសារភាពពីភាពគ្មានទោសពៃរ៍ ត្រូវបានចោទប្រកាន់ពីបទមិនគោរពតាមបញ្ជារបស់មន្រ្តីនគរបាលជាន់ខ្ពស់ ដែលមិនឲ្យប្ដូរទីកន្លែងតវ៉ារបស់ពួកគេទៅកាន់តំបន់ ដែលបានកំណត់នៅក្បែរសន្និសីទ កាលពីឆ្នាំមុន។ ប្រសិនបើត្រូវបានផ្តន្ទាទោស ពួកគេនឹងប្រឈមជាមួយការពិន័យនូវទឹកប្រាក់ច្រើនបំផុតចំនួន ២.៥០០ផោន (៣.១៦០ដុល្លារ) ក្នុងម្នាក់ៗ៕