ការតវ៉ារបស់កសិករ ដែលទាមទារឲ្យមានតម្លៃត្រឹមត្រូវ និងកាត់បន្ថយការិយាធិបតេយ្យហួសហេតុ បានបិទព្រំដែន រវាងប្រទេសបែលហ្ស៊ិក និងហូឡង់ នៅថ្ងៃសុក្រ (ទី២ ខែកុម្ភៈ) ខណៈដែលកសិករនៅបារាំង បានចាប់ផ្តើមដករបាំងបិទផ្លូវទូទាំងប្រទេសហើយ បន្ទាប់ពីរដ្ឋាភិបាលបានធ្វើសម្បទានបន្ថែមទៀត។

ការតវ៉ារបស់កសិករបានផ្ទុះឡើងក្នុងបណ្តាប្រទេសជាច្រើន នៅអឺរ៉ុប ចាប់ពីបារាំង រហូតដល់ប៉ូឡូញ ដោយបង្ហាញពីផលប៉ះពាល់ដ៏តានតឹងលើការធ្វើកសិកម្ម ដោយសារការជំរុញរបស់សហភាពអឺរ៉ុប (EU) ក្នុងការប្រយុទ្ធប្រឆាំងនឹងការបម្រែបម្រួលអាកាសធាតុ ការចំណាយថ្លៃដើមខ្ពស់ និងការប្រកួតប្រជែងពីបរទេស។

ក្នុងសប្តាហ៍នេះ ការខកចិត្តបានឡើងដល់កម្រិតទប់អារម្មណ៍លែងជាប់ នៅទីក្រុងប្រ៊ុចសែលប្រទេសបែលហ្ស៊ិក ជាកន្លែងដែលកសិករបានគប់ស៊ុត និងដុំថ្មដាក់សភាអឺរ៉ុប ហើយបានបាញ់កាំជ្រួច ខណៈដែលពួកគេទាមទារឲ្យមេដឹកនាំសហភាពអឺរ៉ុប នៅឯកិច្ចប្រជុំកំពូលមួយនៅក្បែរនោះ ធ្វើការបន្ថែមទៀត ដើម្បីជួយដល់ពួកគេ។

កសិករបែលហ្ស៊ិក និងហូឡង់ បានបិទច្រកព្រំដែនជាច្រើន រវាងប្រទេសរបស់ពួកគេ នៅថ្ងៃសុក្រនេះ ខណៈដែលពួកគេបានបន្តរារាំងរថយន្តដឹកទំនិញចូល ឬចាកចេញពីកំពង់ផែ Zeebrugge ដែលគ្រប់គ្រងការនាំចូលរថយន្ត និងផលិតផលស្រស់ៗមួយចំនួនពីចក្រភពអង់គ្លេស និងកន្លែងផ្សេងទៀត។ នាយករដ្ឋមន្ត្រីបែលហ្ស៊ិក លោក Alexander De Croo បានជំរុញកសិកររបស់លោកឲ្យដកការបិទផ្លូវរបស់ពួកគេ។

សម្រាប់ពេលនេះ កសិករបារាំងបាននិងកំពុងរុះរើរបាំងបិទផ្លូវជាច្រើនរបស់ពួកគេដែលធ្វើពីចំបើងនៅរាប់សិបកន្លែងទូទាំងប្រទេសបារាំង ក្នុងនោះរួមទាំងផ្លូវហាយវេជាច្រើនដែលតភ្ជាប់ទៅដល់រដ្ឋធានីរបស់ប្រទេសបារាំង ដែលជាផ្អាកការតវ៉ារបស់ពួកគេ បន្ទាប់ពីទទួលបានការសន្យាពីរដ្ឋាភិបាលបន្ថែមទៀត៕