ប្រេស៊ីល ៖ ក្បួនរថយន្តយោធា និងរថពាសដែក បានចេញដំណើរទៅកាន់ព្រំដែនភាគខាងជើងប្រទេសប្រេស៊ីលជាមួយប្រទេសវេណេស៊ុយអេឡា និងហ្គីយ៉ាន កាលពីថ្ងៃសុក្រ ដើម្បីពង្រឹងវត្តមានរបស់កងទ័ពប្រេស៊ីល ដោយសារភាពតានតឹងជុំវិញការទាមទាររបស់វេណេស៊ុយអេឡា ចំពោះតំបន់ អ៊ីសេកហ្គីបូ (Esequibo) ។ កងទ័ព បាននិយាយនៅក្នុងសេចក្តីថ្លែងការណ៍ថា យានរថពាសដែកចំនួនពីរគ្រឿង បានទៅដល់ទីក្រុង Manaus ដោយការដឹកជញ្ជូនតាមដងទន្លេ ហើយរថយន្តមួយចំនួន បានចេញដំណើរតាមផ្លូវថ្នល់ទៅកាន់ទីក្រុង Boa Vista រដ្ឋធានីនៃរដ្ឋ Roraima ជាទីតាំងយោធភូមិភាគក្នុងតំបន់ ដែលនឹងត្រូវបង្កើនទាហានដល់៦០០នាក់។ ជម្លោះព្រំដែនពាក់ព័ន្ធនឹងតំបន់មានទំហំ ១៦០.០០០គីឡូម៉ែត្រការ៉េនៃប្រទេសហ្គាយ៉ាន(Guyana) មានទំហំធំជាងពីរដងនៃប្រទេសអៀរឡង់ និងភាគច្រើនជាព្រៃក្រាស់។ ប្រទេសវេណេស៊ុយយអេឡា បានធ្វើសកម្មភាពទាមទាររបស់ខ្លួននៅតំបន់ Esequibo ក្នុងប៉ុន្មានឆ្នាំថ្មីៗនេះ បន្ទាប់ពីការរកឃើញទីតាំងប្រេង និងឧស្ម័នដ៏ធំនៅឆ្នេរសមុទ្រ ហ្គីយ៉ាន។ ប្រទេសវេណេស៊ុយអេឡា និងហ្គីយ៉ាន បានព្រមព្រៀងគ្នាកាលពីខែធ្នូថា មិនឱ្យប្រើកម្លាំង ឬធ្វើឲ្យរីកធំភាពតានតឹងក្នុងជម្លោះ តំបន់ Esequibo នោះទេ នៅក្នុងកិច្ចប្រជុំមួយ។ កាលពីសប្តាហ៍មុន ក្នុងកិច្ចប្រជុំដែលសម្រុះសម្រួលដោយប្រទេសប្រេស៊ីល ប្រទេសវេណេស៊ុយយអេឡា បានប្តេជ្ញាប្រកាន់ខ្ជាប់ផ្នែកកការទូត ដើម្បីដោះស្រាយជម្លោះ។

ប៉ុន្តែការគំរាមកំហែងនៃការឈ្លានពានរបស់វេណេស៊ុយអេឡា ត្រូវបានយកចិត្តទុកដាក់ខ្លាំងដោយរដ្ឋាភិបាលប្រទេសប្រេស៊ីល ដែលបានព្រមានថា នឹងមិនអនុញ្ញាតឱ្យវេណេស៊ុយអេឡា ប្រើប្រាស់ទឹកដីប្រេស៊ីលនៅរដ្ឋ Roraima ដើម្បីឈ្លានពានតំបន់ Esequibo ឡើយ ហើយពុំមានផ្លូវដីផ្សេងទៀតឆ្លងកាត់ព្រៃនោះទេ។